Atualità
Ponsiuns minimes y contribut provinzial: incuntades ai 2 y ai 9 de setëmber
Da püch à zitadins cun la ponsiun minimala la poscibilité da ciafè n contribut provinzial por les spëises secundares sön l’abitaziun: chësta dezijiun é gnüda presentada inier (ai 28 de messè) a Balsan dal’assessuria Martha Stocker y dai sindacać, patronać y dales federaziuns por jënt atempada. Evënć d’informaziun por les porsones interessades gnarà organisà ai 2 y ai 9 de setëmber.
Da setëmber inant po i zitadins che ciafa la ponsiun minimala ti presentè na domanda ai raiuns sanitars por n contribut provinzial por le finanziamënt dles spëises secundares sön l’abitaziun (por ejëmpl sön eletrizité, gas o scialdamënt). L’assessuria Marta Stocker à presentè inier, lönesc ai 28 de messè, les mosöres ai sindacać, patronać y ales federaziuns por jënt atempada. „Nosta ghiranza é chëra da miorè la situaziun finanziara dles porsones che ciafa la ponsiun minimala“, insciö Stocker. Por podëi mëte man cun setëmber él inće preodü n’incuntada cun l’INPS por assiguré che le contribut provinzial ne vëgnes nia valuté sciöche davagn y che ess sciöche conseguënza detraziuns sön la ponsiun. Al messarà gnì splighé avisa che chësta mosöra ne é nia na prestaziun regolara mo che al é na retüda dles spëises al zitadin, insciö Stocker.
Chësc contribut finanziar é preodü por zitadins a chëstes condiziuns: le zitadin vir da su, al à 70 o passa agn, sües entrades dla ponsiun ne po nia superè i 7.800 euro netto al ann y al ne po nia ester n possès de bëgns sura na certa valüta ater co la ćiasa o l’abitaziun de proprieté. Por le momënt él preodü che zirca 5 mile zitadins ademplësc a dötes les condiziuns por podëi fà domanda, „mo chësc odarunse impormò canche les domandes gnarà dades jö“, insciö Stocker.
Por informè i interessà de chëstes novitês él preodü döes incuntades cun i zitadins tles sëntes di Raiuns Sanitars ai 2 y ai 9 de setëmber. Implü gnaràl inće organisé na seria de domisdês d’informaziun en colaboraziun cun sindacać, patronać y assoziaziuns por jënt atempada. Tratan chëstes scomenciadies saràl inće poscibl da presentè les domandes. „Inće chi che ciafa bele n contribut provinzial por les spëises secundares dess s’informè, deache al po ester che ai à le dërt da ciafè na soma plü alta“, à splighé la direturia dl Ofize Jënt atempada y raiuns sanitars Brigitte Waldner.
Dötes les porsones interessades é inviades a to pert ales incuntades d’informaziun, tolon cun sè n documënt de reconescimënt varënt, le numer de codesc fiscal y na documentaziun dles ponsiuns ciafades ćina śëgn. Sce la porsona interessada vir en afit éra periada da portè para inće le contrat d’afit. Les documentaziuns suplementares po gnì dades jö inće plü inant.
rc
