Atualità
Bandides de concursc por sorvisc: L’atestat de bilinguism sarà obligatore
L’atestat de bilinguism (y trilinguism) sarà un di criters fondamentai por les bandides de concursc por i sorvisc scrić fora dala Provinzia: daimpröma sciöche critêr cualitatif, daldô sciöche critêr d’estlujiun. Chësta dezijiun é gnüda tuta incö (mertesc, ai 29 de messè) dala Junta dla Provinzia.
La Junta dla Provinzia à dè jö n arat positif sön na majera conscideraziun dl atestat de bilinguism pro les bandides de concurs por sorvisc scrić fora dala Provinzia. „Düć chi che pîta n sorvisc olache an röia en contat diret cun la popolaziun messarà avëi l'atestat de bilinguism“, à dit le Presidënt dla Provinzia, Arno Kompatscher, incö tratan la conferënza stampa do la sentada dla Junta. L’atestat de bilinguism gnarà naôta definì sciöche critêr cualitatif, chël ô dì, che la presënza dla zertificaziun porta à de plü punć pro la valutaziun dl’oferta presentada. „Te n secundo momënt él preodü che la manćianza dl’atest de bilinguism portes al’estlujiun“, insciö Kompatscher che recorda che por les valades ladines gnaràl lauré fora i medemi critêrs, mo sön la basa dl trilinguism.
Chësta revalorisaziun dl atest de bi(tri)linguism é importanta y nezesciara tl Südtirol, deache insciö vëgn miorada la cualité di sorvisc por le zitadin, mo al é inće na mosöra por les aziëndes dl post: „Les aziëndes à le tëmp nezesciar por podëi s’adatè a chësta mudaziun y arà tl dagnì n vantaje de competitivité cun aziëndes da foradecà“, à splighé Kompatscher.
rc
