Atualità
BLS, TIS, EOS y SMG vëgn metüdes adöm
Les cater sozietês provinziales che atualmënter pîta sorvisc por l’economia gnarà metüdes adöm: chësta dezijiun à tut incö (mertesc ai 29 de messè) la Junta dla Provinzia. La ragrupamënt te öna na sozieté é gnüda laorada fora dai proprietars dles sozietês, la Provinzia y la Ćiamena dl Comerz.
Por le momënt él cater sozietês che pîta sorvisc por l’economia tl Südtirol: l’Agenzia BLS (Business-Location-Südtirol), la Südtirol Marketing Gesellschaft (SMG), che s’ocupëia de marketing dl turism, la sozieté TIS (Technology Innovation Park), che pîta sorvisc tl setur dl inovaziun, y l’Export Organisation Südtirol (EOS). „Tratan les ultimes edemes s’unse damanè sce la manira sciöche les sozietês é metüdes sö é la plü efiziënta“, à dit le Presidënt dla Provinzia, Arno Kompatscher, incö do la sentada dla Junta Provinziala. Dötes les cater sozietês à por le momënt n consëi d’aministraziun, na sënta, na direziun, na repartiziun por le personal y n secretariat. „Insciö unse laurè fora n’analisa interna dles sozietês, che desmostra che al é poscibl da mëte adöm cërtes competënzes“, insciö Kompatscher.
Insciö à i proprietars, la Provinzia de Balsan, la Ćiamena de Comerz y le Comun de Balsan (por ći che reverda le TIS), tut la dezijiun da mëte adöm les cater sozietês y fà adinfora ma plü öna. Do che le ragrupamënt dles sozietês é gnü stabilì, gnaràl śëgn laurè fora n plan por la realisaziun concreta dla mosöra, insciö Kompatscher.
La converjiun gnarà realisada en colaboraziun cun les sozietês interessades sciöche inće cun les istituziuns dl’economia, à dit Kompatscher. „Le prozes d’unificaziun prevëiga n tëmp de transiziun, inće por podëi ti conzede ales cater sozietês da se reorganisé tla manira plü otimala“, insciö Kompatscher.rc
