Atualità
Junta provinziala: Sostëgn por na scora europeica a Maran
Na scora alta cun n orientamënt europeich: chësta é la proposta dla scora tlassica „Beda Weber“ de Maran che é gnüda portada dant incö (mertesc, ai 29 de messè) dal assessur por la scora todëscia Philipp Achammer. La Junta provinziala à garantì so sostëgn al proiet.
Sciöche bele da plü tëmp é le pröm punt sön l’ordinn dl dé dla sentada edemala dla Junta provinziala l’Euregio y sü proieć. Incö él gnü baié dles colaboraziuns tl setur scolastich y l’assessur por la scora y cultura todëscia Philipp Achammer à porté dant la proposta dla scora alta tlassica Beda Weber da Maran y che é chëra da cherié na scora alta cun n orientamënt europeich. Scomenciadies te chësc vers é bele piades ia te scores altes a Desproch y a Trënt.
N lizeum tlassich de orientamënt europeich podess insciö avëi sciöche prioritês danter l’ater le stüde di lingać, l’aprofondimënt di contignüs dl’Uniun Europeica y de sües istituziuns y dandaldöt le barat danter scolars y scores sura i confins provinziai fora. La Junta provinziala à tut la dezijiun da promöie le proiet tres l’ativité dl GECT (Grup europeich de cooperaziun transfrontaliera) tl raiun dl Euregio danter le Südtirol, le Tirol y le Trentin.
rc
