Atualità
Frabicat dla scora a Urtijëi: Ombolt y direturia vijitëia Schuler
Frabicat nü o ressanamënt dl frabicat esistënt dla scora mesana de Urtijëi: chësta tematica é stada al zënter dl’incuntada da incö (mertesc, ai 29 de messè) danter l’assessur por i Comuns Arnold Schuler y na delegaziun de rapresentanć da Urtijëi.
Le chestiun dl ressanamënt dla scora mesana de Urtijëi é atuala y debatüda, por le mantignimënt dla palestra él gnü racoiü 150 firmes. Por l’ombolt Ewald Moroder, la direturia dla scora Maria Kostner y la referënta scolastica Lara Moroder podess na costruziun nöia ester plü adatada ales esigënzes di scolars y insegnanć, dandaldöt por ći che reverda la manćianza de post tl frabicat atual. L’ombolt Ewald Moroder à referì tratan l’incuntada cun l’assessur Arnold Schuler che le Consëi de Comun à tut na dezijiun vers n frabicat nü. La direturia Kostner à sotligné che le frabicat esistënt mëss gnì ressanè, dandaldöt deache al ne pita degun post por na mensa, locai por ativitês secundares y plazes da parché por i insegnanć. Le conzet pedagogich foss plü saurì da realisé cun n frabicat nü, insciö Kostner.
Por le momënt, à dit l’assessur Arnold Schuler, él da aspetè ai resultać dla valutaziun tecnica: indoman, mercui ai 30 de messè, saràl le diretur dla Repartiziun Frabiches y sorvisc tecnich Andrea Sega che fajarà n suralüch a Urtijëi. Daldô gnaràl organisé n’incuntada cun l’assessur Schuler.
rc
