Atualità
Ospedal de Balsan: Tommasini y Stocker vijitëia le cantier dla tlinica nöia
L’assessur por i laûrs publics Christian Tommasini y l’assessuria por la sanité Martha Stocker, à fat inier, mertesc ai 29 de messè, n suralüch al cantier dla tlinica nöia de Balsan. Ai é gnüs acompagnà dai funzionars dl’Aziënda Sanité, dai tecnics y dai responsabli di laûrs. Atualmënter vëgnel laurè a n ampliamënt y a na restrotoraziun dl ospedal da Balsan.
Le frabicat nü vëgn fat sö dlungia l’ospedal esistënt y arà indöt cinch alzades sura tera y döes sot tera. Tl frabicat nü gnaràl metü ite le pröm aiüt, i sorvisc d’emergënza y la chirurgia. Sön le cantier laôra atualmënter dai 115 ai 260 lauranć. Do le completamënt dla strotöra fondamentala gnaràl laurè sön l’istalaziun di implanć nüs, la realisaziun di interns y dles falzades. La tlinica nöia tol ite na cubatura de 255.100 metri cubics, i cosć de realisaziun prevëiga na spëisa de zirca 232 miliuns de euro.
Le cantier dl ospedal da Balsan, à dit l’assessur Tommasini, é le plü gran te döt le Südtirol y é partì sö te de plü loć ćina le 2025. „Por merit dla strotöra nöia arà la Provinzia de Balsan y sü zitadins na strotöra moderna cun dötes les inovaziuns tecnologiches por pité sorvisc ezelënć tl setur dla sanité. I laûrs va inant y chësc é inće na confermaziun dl impëgn dla Provinzia a porté inant chësc proiet.“
L’assessuria Martha Stocker é romagnüda imprescionada dala cualité alta dl laûr sön le cantier y à orü sotligné che le frabicat nü tëgn cunt dles esigënzes nöies y che i zitadins ciafarà insciö n post arjigné ca por sües ghiranzes.
Le proiet por la realisaziun dl’opera é gnü fat dal architët Astrid Tiemann-Petri da Stuttgart che à davagnè la bandida dl concurs de planificaziun che é gnü scrit fora dala Provinzia a livel internazional tl 1998.
Le injinier Danilo Mora, le diretur tecnich dla 3M Engineering S.r.l. y l’architët Astrid Tiemann-Petri à presenté les carateristiches dl frabicat nü sot l’aspet dla cualité architetonica. Tla alzada a tera saràl da ciafè de plü punć d’informaziun, n valgügn sorvisc dl’aministraziun, n restorant, n bar, na posta, na banca y n valgönes plazes vërdes. Tles arees dla pröma alzada gnaràl inserì i ambulatori chirurgics. Le pröm aiüt gnarà inće metü ite tla pröma alzada, cun n’entrada aposta ma por les ambulanzes. Implü saràl da ciafè tla pröma alzada le sorvisc de spartiziun „triage“, che arà le compit da partì sö i paziënć do la gravité di caji, sciöche inće la radio-diagnostica y n salf da aspetè. Tla secunda alzada ciafarà albergh i 14 salfs por les operaziuns, n’area de terapia intensiva y sub-intensiva y la sterilisaziun zentrala nöia. L’inserimënt dles unitês funzionales dl’endo-urologia, dla litotripsia y dles sojornanzes te ospedal por gaujes chirurgiches sarà da ciafè tla terza y cuarta alzada. Implü él inće preodü de plü zones vërdes dlungia la strotöra nöia por mioré la cualité de vita di paziënć y dl personal dl ospedal. Sön le tët dl ospedal gnaràl realisé na plaza da arsì por elicotri cun n colegamënt dirët cun i lifć y cun zones de azès ma por le personal. Les alzades sot tera é preodüdes por implanć tecnics y por locai da se mudé.
Le ingrès prinzipal gnarà spostè danter le frabicat nü y l’ospedal bele esistënt y sarà le punt de coliamënt danter i vari ofizi y salfs d’aldedaincö y de chi che gnarà laprò. Cun la realisaziun de chësta area, che porta l’inom de „magistrale“, gnaràl completè la pröma fasa de costruziun. La fin di laûrs é preodüda por le 2017-18 y indöt costa chësta pröma fasa de costruziun 21 miliuns de euro. Do la fasa d’ampliamënt dl ospedal cun na strotöra nöia y do che de plü sorvisc arà podü se trasferì tl frabicat nü, saràl poscibl da ressanè la strotöra esistënta. La realisaziun dl ressanamënt é gnüda partida sö te cater fases danter le 2018 ćina le 2025. Do la contlujiun dl ressanamënt gnaràl inće reorganisé l'orientamënt di ofizi y salfs tl ospedal. Insciö podaràn ciafè tla strotöra atuala do le ressanamënt chisc sorvisc: les disciplines internistes, n’area por la cura de viadus, n’area por le „day hospital“ y la „day surgery“, n’area d’oncologia y n’area d’aministraziun.
rc
Galaria dales fotografies
