Atualità

Cursc | 31.07.2014 | 15:22

Da Roma: No ala proposta sön les finanzes, sodesfaziun por le Presidënt nü

La nota positiva dl iade dl Presidënt dla Provinzia, Arno Kompatscher, incö (31/07) a Roma é stada l'eleziun de Sergio Chiamparino sciöche Presidënt dla Conferënza dles Regiuns. Le Presidënt dla Provinzia ne s’à indere nia mostrè contënt dla proposta sön na spartiziun nöia dles finanzes danter le Stat y la Provinzia: „La proposta presentada incö dal Govern é inazetabla“, à dit Kompatscher.

Tl danmisdé da incö, mertesc ai 21 de messè à le Presidënt dla Provinzia, Arno Kompatscher y le Presidënt dla Provinzia de Trënt Ugo Rossi incuntè le Secretêr dl Stat Gianclaudio Bressa y i funzionars dl Ministêr dles Finanzes por tratè la definiziun dl contribut finanziar dles autonomies al ressanamënt di cunć dl Stat. L’incuntada ne é nia stada positiva, la proposta presentada dal Govern por stabilì la partezipaziun dles döes Provinzies é gnüda definida da Kompatscher y Rossi „inazetabla“. „De chësta proposta, inće da siöche ara é gnüda formulada, ne ùnse gnanca bria de laurè.“ An aspeta insciö che le Ministêr fejes i proscimi vari.

Le Presidënt Kompatscher à daldô tut pert ala Conferënza dles Regiuns y dles Provinzies autonomes, reunides te na sentada straordinaria y ma cun un en punt sön l’ordinn dl dé: l’eleziun dl Presidënt y dl Ofize de Presidënza dla Conferënza, n vare nezesciar da to, deache Vasco Errani, Presidënt por nü agn, à dè les dimisciuns. Al é gnü lité al’unanimité Sergio Chiamparino (governadù dl Piemont) sciöche Presidënt nü dla Conferënza dles Regiuns. Contënt dla nomina,s'à mostrè Arno Kompatscher: „Chiamparino conësc bun i problems di raiuns alpins y al à tres mostrè gran interès vers les esigënzes dles Regiuns y dles Provinzies autonomes." Kompatscher à stlüt jö dijon: „Le Presidënt nü sarà na porsona de referimënt afidabla por la Provinzia de Balsan.“

USP

Galaria dales fotografies