Atualità
Consëi por l’archirida: Renforzamënt dla rëi danter istituziuns y aziëndes
Indöt 100 miliuns de euro investësc la Provinzia de Balsan chësc ann por le sostëgn dl’archirida y dl’inovaziun. „Nos odun chisc dui ćiamps sciöche fondamentai por nosc svilup“, à dit le Presidënt dla Provinzia, Arno Kompatscher, tratan la sentada da incö (ai 4 de agost) cun le Consëi por la sciënza y l’archirida, tratan chëra che al é inće gnü tut la dezijiun da scrì fora dui concursc nüs.
72 miliuns de euro é l’import dl sostëgn provinzial por l'ativité dl’Université y por l’archirida, laprò röiel ćiamò 28 miliuns de euro sciöche sostëgn por l’inovaziun dles aziëndes. „Nos sun sigüsc che le sostëgn por l’archirida, le svilup y l’inovaziun é fondamental por le svilup dl’economia y por la cualité de vita tl Südtirol“, à dit le Presidënt Kompatscher incö (04.08) a Balsan y à ajuntè, che al é important da intensifiché le barat d’informaziuns danter les aziëndes inovatives y les istituziuns d’archirida. „I messun ester bugn da mëte sö na rëi danter le monn dl laûr y les istituziuns dl’archirida, olache i bojëgns dles aziëndes röies diretamënter a nüsc scienzià y inće dl ater vers, che les conescënzes nöies röies dai scienzià ales dites“, insciö Kompatscher.
N vare important é de chësc vers la creaziun de n forum IT, olache dötes les perts po s’informè sön l’archirida y l’inovaziun. „Chësta rëi d’informaziuns à la funziun da coleghè dötes les perts interessades sciöche inće da registré y da valuté l’ativité dl’archirida“, à dit Kompatscher, che oress cherié insciö inće na „cherta geografica basada sön l’archirida“. „Chësc forum IT é por le momënt ćiamò tla fasa de proa y piarà tosc ia cun süa ativité regolara“, insciö Kompatscher.
La rëi de barat ti ćiamps dl’archirida y dl’inovaziun dess insciö nia ma gnì ampliada tl raiun provinzial, mo sura döta la Euregio. „Sce les istituziuns d’archirida laôra adöm te döta l’Euregio podunse inće anuzé damì les informaziuns y evité insciö laûrs fać dui iadi“, à splighé Kompatscher.
Le Presidënt dla Provinzia à inće lascè alsavëi incö, lönesc ai 4 de agost, che la Junta provinziala scriarà fora dui concursc da d’altonn. Le pröm concurs é ponsè sciöche sostëgn por la mobilité di scienzià y prevëiga n contribut de mez miliun de euro, le secundo à sciöche fin le sostëgn de aziëndes che dà da laûr a scienzià o personal cun cualifiches altes, cun na soma de sostëgn preodüda de 1,6 miliuns de euro.
rc
Galaria dales fotografies
