Atualità
Dala Junta: Forum Alpach, resultać sön le svilup dl Euregio
Co ćiara pa fora le dagnì dla Regiun Europeica dl'Euregio? Chësta é öna dles domandes zentrales a chëres che an ti jarà do a mez agost tratan le forum europeich a Alpach. La Junta provinziala à incö, mertesc ai 5 de agost aprofondì la tematica sön le svilup dl'Euregio tratan süa sentada edemala.
Le 17 de agost é le dé dl’Euregio al Forum europeich a Alpach: al zënter dla discusciun sarà le svilup dla Regiun transfrontaliera danter le Tirol, le Südtirol y le Trentin ti seturs sciöche l'economia, l'archirida, la cultura y la sciënza. Insciö gnaràl inće presentè i resultać dl proiet „EuregioLab“, n laboratore che à le compit da ti jì do ales prospetives coletives dl'Euregio. Dl laboratore "EuregioLab" fêjel pert scienzià y rapresentanć dl monn dla cultura, economia, archirida y dla politica. Do la presentaziun di resultać saràl i trëi presidënć dles provinzies Platter, Kompatscher y Rossi che darà jö so contribut. „I porvarun da ciafè fora cares che é les propostes che po gnì realisades y metüdes da jì te n cört tëmp“, à splighé le Presidënt dla Provinzia Arno Kompatscher incö do la sentada dla Junta.
Kompatscher à bele albü n’incuntada inier (04.08) cun Franz Fischer, Presidënt dl Forum Alpach, tratan chëra che al é gnü arjigné ca le dé dl’Euregio. Incö él spo gnü debatü tratan la sentada dla Junta provinziala sön chësta tematica: „Nos ùn porvè da capì cara che é nosta posiziun por le momënt te vigni setur y cal che é nosc contribut por ći che reverda les propostes singoles“, insciö le Presidënt dla Junta incö.
rc
