Atualità
Aministraziun publica: Le sparagn superëia les previjiuns dl 40 porcënt
La revijiun dles spëises atuales porta a n smendrimënt important di cosć tl’aministraziun publica: incö (05/08) ti él gnü presentè ala Junta provinziala le raport dla comisciun competënta por le sparagn di cosć por l’ann 2013 che à registré n superamënt dla soma de sparagn preodüda (4,04 miliuns de euro).La Provinzia sparagna indöt 5,76 miliuns de euro, 40 porcënt deplü co dè dant dales previjiuns
Danter i obietifs primars dla Junta en conscideraziun dl'aministraziun publica ne él nia ma l’ampliamënt dla trasparënza y la prevenziun dla coruziun mo inće le smendrimënt di cosć: chisc fins é dà dant al’aministraziun publica dala lege y i resultać vëgn presentà ann por ann. „Do les consultaziuns cun i sindacać ânse albü sciöche obietif n sparagn por le 2013 tla gestiun dl’aministraziun publica de 4,04 miliuns de euro“, à splighé incö le Presidënt dla Provinzia Arno Kompatscher tratan la conferënza stampa do la sentada dla Junta. Ala Junta provinziala ti él gnü surandè incö le raport dla comisciun competënta: „Por le 2013 él gnü registré n smendrimënt di cosć de 5,76 miliuns de euro“, insciö Kompatscher.
Insciö él preodü le smendrimënt dles spëises te de plü seturs, sciöche por ejëmpl pro le laûr straordinar, por inćiaries de consulënza, sciöche sparagn energetich ti frabicać o pro les lizënzes por la software, olache an à podü sparagné cun l’anuzamënt de produć zënza lizënza. Implü él inće gnü smendrì le numer dles publicaziuns sön papier y aumentè les publicaziuns tres internet. Conscideran le sparagn complessif te düć chisc seturs él stè meso da sparagné tl 2013 indöt 5,76 miliuns de euro, 1,7 miliuns sura les previjiuns, n sparagn de 43 porcënt plü alt co chël preodü.
Dui é stà inće i ejëmpli che le Presidënt dla Provinzia à portè dant incö: „Pro les inćiaries por consulënzes él preodü n smendrimënt di cosć de 800.000 euro, indöt él gnü fora n sparagn de 1,52 miliuns de euro“, insciö Kompatrscher. 540.000 euro é gnüs sparagnà por le passaje dles publicaziuns dal papier al internet.
rc
