Atualità
Sanité: La colaboraziun danter le Südtirol y le Tirol vëgn arlunjada
La situaziun atuala y i svilups tl dagnì dla colaboraziun tl setur dla sanité danter la Provinzia de Balsan y le Land Tirol é stà al zënter dl’incuntada ai 18 de agost danter l’assessuria por la sanité Martha Stocker y l’assessur dl Land Tirol Bernhard Tilg adöm cun rapresentanć y direturs di ospedai y dla sanité dl Tirol (Tilak).
N valgönes dles tematiches tratades dai dui assessurs Stocker y Tilg é stades i sorvisc d’emergënza y de pröm aiüt, l’organisaziun di ospedai dl Tirol (Tilak) y la colaboraziun ti seturs dla formaziun y dl ajornamënt di doturs inće tl ćiamp dl’archirida. Trami dui i rapresentanć é stà a öna che la colaboraziun ti proscimi agn dess gnì ampliada.Tratan l’incuntada él inće gnü debatü sön la colaboraziun tl dagnì por ći che reverda l’assistënza sanitara por paziënć che vëgn dal Südtirol. Sön la basa de n’acordanza danter la Provinzia de Balsan y le Land Tirol él poscibl che paziënć dal Südtirol vëgnes curà te strotöres sanitares tl Tirol. Deache chësta acordanza toma cun la fin dl ann él inće gnü baié de n arlunjamënt dla convenziun.
L’assessuria por la sanité Martha Stocker à anuzé l’ocajiun por vijité le zënter sanitar de Desproch, jon inće a ti ćiarè ales tliniches universitares olache la presënza de zitadins dl Südtirol é alta: danter chëstes les tliniches universitares de pediatria, de ginecologia y de neonatologia (vigni ann vëgnel curì chilò dai 50 ai 60 viadus südtiroleji nasciüs premadüs).N’atra tlinica importanta por paziënć dal Südtirol é chëra dles traplantaziuns, olache i paziënć che vëgn dala Provinzia de Balsan po inće ciafè organns da donadus dl’Austria. Sciöche l’assessuria Stocker à sotligné, confidëia i paziënć dl Südtirol dër tröp tla tlinica universitara de Desproch, che à, por mirit dles traplantaziuns, inće podü salvè la vita. „I doturs nes à referì che i donadus de organns dal Südtirol é jüs zoruch ti ultimi agn y porchël oressi sensibilisé sön chësta chestiun y recordè la gran importanza dla donaziun de organns“, à dit Stocker.
L’assessuria por la sanité Martha Stocker é gnüda acompagnada da süa referënta particolara Astrid Pichler, dal diretur dl Assessorat Thomas Mathà y dala direturia dla Repartiziun Irmgard Prader. L’assessur Bernhard Tilg é gnü acompagné dal diretur de so ofize Clemens Rissbacher, dal suranstant dl „Tiroler Gesundheitsfond“ Johannes Schöch y dal diretur dl consëi d’aministraziun Stefan Deflorian.
rc
