Atualità
Premià 106 studënć che à stlüt jö la scora alta cun le mascimo di punć
Incö danmisdé él gnü tignì tl Palaz Widmann a Balsan la premiaziun di jogn y dles jones che à stlüt jö l’ejam de maturité cun le numer de punć plü alt. Presënć ala premiaziun é stà le Presidënt dla Provinzia Arno Kompatscher, i assessurs Achammer y Tommasini y le diretur dla Repartiziun ladina Alexander Prinoth.
106 studënć che à stlüt jö l’ejam contlusif dla scora alta cun le numer plü alt de punć é gnüs festejà incö tla curt interna de Palaz Widmann dal Presidënt dla Provinzia Arno Kompatscher, dai assessurs por la scora y cultura, Christian Tommasini y Philipp Achammer y dal diretur dla Repartiziun dla Cultura y Intendënza scolastica ladina Alexander Prinoth, en rapresentanza dl assessur por la scora ladina Florian Mussner.
Le Presidënt dla Provinzia Arno Kompatscher à sotligné tratan la premiaziun la gran orentè y preparaziun che à porté i studënć a stlü jö i cinch agn de scora alta cun na valutaziun tan ezelënta.
„Osc resultat ne é nia ma n travert personal mo al porta inće pro al arichimënt de döta la sozieté te Südtirol“, insciö Kompatscher che ti aôda a düć i studënć presënć n dagnì plëgn de sodesfaziuns y realisaziuns dles aspetativês y de pratiché plü inant na profesciun che i acontentëies.
Inće l’assessur Christian Tommasini à dè pro süa amiraziun por i jogn y à sotligné che le plurilinguism é un di majeri vantaji por ći che reverda l’educaziun y la formaziun di jogn y studënć dl Südtirol. L’assessur à inće recordé che i resultać ezelënć dl ejam contlusif é la confermaziun dla cualité dl sistem scolastich provinzial: „I me augüri inće che i jogn, do avëi stlüt jö süa formaziun, pois dè n contribut personal a nosta sozieté.“Le diretur dla Repartiziun dla Cultura y Intendënza scolastica ladina Alexander Prinoth ti à ince fat ai jogn les mius aodanzes speran che: "gnëis indô zoruch te Südtirol por contribuì al svilup de nosta sozietè, do che ëis stlüt jö i stüdi foradecà."
Ajuntada pon ciafè la lista di studënć premià incö danmisdé.
rc
Galaria dales fotografies
