Atualità
“Rundenì de lijëndes”: Presentaziun dl poem musical a Urtijëi y San Martin
Tl cheder dla colaboraziun danter le Departimënt Educaziun y Cultura Ladina y les Scores de musiga ladines él gnü laoré fora le poem musical “Rundenì de lijëndes” por rapresenté musicalmënter la tradiziun de valüta dles liëndes ladines. Le resultat final gnará presenté dai scolars y dales scolares ai 20 y ai 21 de aurí a Urtijëi y ai 24 de aurí a San Martin.
Colié les liëndes ladines, la musiga, le liam dles porsones cun la natöra y le turism por ti dé impulsc ales generaziuns nöies y valorisé i contignüs dla cultura y storia ladina: Chisc é i fins prinzipai dla creaziun de n poem musical dal titul “Rundenì de lijëndes” che coliëia les composiziuns di tesć lirics de Roland Verra cun la musiga de Matthäus Crepaz. Por chësc fin él gnü a se le dé na colaboraziun danter la seziun musicala dla scora mesana da Urtijëi, le Lizeum d’Ert Cademia y les Scores de musiga de Gherdëna y dla Val Badia. La regia é de Donatella Valletta y le proiet é gnü coordiné da Susy Rottonara dl Sorvisc por l’educaziun musicala dl’Intendënza Ladina. Le resultat final gnará presenté
ai 20 de aurí (dales 20.30) y ai 21 de aurí (dales 16.30 y dales 20.30)
trami dui i iadi
tla Ciasa dla Cultura
a Urtijëi.
y ai
ai 24 de aurí
dales 17 y dales 20.30
tl salf dla scora mesana
a San Martin de Tor.
Düc i dër bel inviá da gní a ascuté sö. L'entrada é debann (spënora lëdia).
I tesć dl poem musical é gnüs scric dal’Intendënt dla Scora ladina Roland Verra y mostra sö n carater plütosc elegiach y respidlëia le dejider da se vire ite te n monn mitich pordü, te chël che i abitanc de nostes Dolomites viô en armonia cun la natöra y cun le monn di spiric. Sciöche contrast vëgnel rapresenté y comenté i ezesc dl svilup turistich tl tëmp presënt.
Tres chësc proiet dess ince gnì sostignida la creativité tl ambit ladin, aladô dles priorités dl Departimënt Educaziun y Cultura Ladina y dl Assessorat ala Scora y Cultura Ladina por chësc ann, cun l’aodanza che la colaboraziun danter istituziuns y organisaziuns desvalies vëgnes portada inant ince tl dagní sciöche na ativité fondamentala dl percurs formatif tles valades ladines.
L'invit é gnü injunté.
rc
