Atualità
Relief de Mussolini: surandada dla proietaziun y dla direziun di laurs
Le proiet de spligaziun storica dl relief de Mussolini tla plaza dla Signoria a Balsan va inant: insciö ti él gnü surandé sëgn l’inciaria por la proietaziun, la direziun di laurs y le coordinamënt dla segurëza al davagnadú dl concurs, l’architët Luca Marchesoni da Balsan.
Do la daurida dl zënter de documentaziun sot al Monumënt ala vitoria él incö, lönesc ai 14 de aurí, gnü fát le proscim vare por la spligaziun storica di monumënc dl fascism tl Südtirol. Le proiet plü atual reverda l’inserimënt te n contest storich dl relief de Mussolini che é da ciafé sön le palaz di Ofizi finanziars tla plaza dla Signoria a Balsan. Por realisé i laurs á la Junta provinziala inciarié le medemo grup de laur che â planifiché l’esposiziun sot al Monumënt ala vitoria. L’intervënt de spligaziun prevëiga la presënza dl pinsier de Hannah Arendt „Degügn ne á le dërt da stimé“ y de na tofla d’informaziun. „Chësc pinsier rapresentëia la resposta dla democrazia ales provocaziuns dles ditatöres“, á splighé le presidënt dla Provinzia Arno Kompatscher incö (14 de aurí) do la sentada dla Junta.
Sëgn él gnü stlüt jö la prozedöra por la surandada dla proietaziun, dla direziun di laurs y dl coordinamënt dla segurëza y che é gnüda davagnada dal architët Luca Marchesoni da Balsan cun n’oferta de 24.500 euro. L’import de basa dl concurs ê de 50.000 euro. Le presidënt dla Provinzia á recordé inant che i proscims vari sará l’elaboraziun de n proiet de realisaziun adöm ai artisć dl grup de laur. D’isté gnarál spo plü sigü scrít fora i laurs, tl mëis de otober dessél spo gní istalé la scrita y la tofla d’informaziun.
rc
