Atualità
Südtirol Pass 65+: Regolamënt de transiziun ciamó cina la fin d’aurí
Dötes les zitadins y düc i zitadins che adora l’abonamënt „Südtirol Pass 65+“ y che á complí o complësc i agn ti pröms cater mëisc de chësc ann, á ciamó tëmp cina la fin d’aurí da renové l’abonamënt. Dai 71 agn inant é le prisc por n abonamënt anual dl Abo65+ de 20 euro.
Chësta soluziun de transiziun vëgn metüda a desposiziun ai zitadins y les zitadines che s’anüza dl Abo65+ por avëi le tëmp nezesciar da s’informé y da renové l’abonamënt. Dal pröm de má inant sarál le Südtirol Pass65+ ma plü varënt cina le compliann dl’anuzadëssa o dl anuzadú. Düc chi che á l’interés da renové so abonamënt por un n ann pó le fá le plü adora n mëis dan le compliann se presentan ales portines de venüda dl trasport publich local cun l’abonamënt atual y paian la tarifa anuala.
La tarifa anuala é gnüda aproada dala Junta provinziala l’ann passé. Tres chësta mudaziun paia i anuzadus danter i 64 y i 69 agn, zënza mudaziuns, n cost anual de 150 euro. I anuzadus che complësc i 70 agn tl 2015, paia dala data de so compliann inant na tarifa anuala de 75 euro. Anuzadus dai 71 agn insö paia 20 euro al’ann por podëi adoré i mesi dl trasport publich te Südtirol.
La tomada dl termin por vigni singul Abo65+ ti vëgn segnalada al anuzadú do vigni timbradöra sön le display dles corieres y/o sön i aparac de timbradöra dles staziuns dles ferates. Sce al ne vëgn nia efetué le paiamënt cina le termin dé dant, spo ne pó le abonamënt nia plü gní adoré y sará ma indô varënt do le paiamënt dla tarifa anuala.
Düc chi che fej por le pröm iade l’abonamënt Abo65+, pó jí a se tó le formular pro les portines de venüda dl trasport publich local. I formulars é ince da ciafé sön internet sot a www.suedtirolmobil.info. Por i abonamënc che gnará fác da sëgn inant gnarál tut en conscidraziun,por le renovamënt anual, la data d'ativaziun dl abonamënt y nia plü la data de nasciüda.
rc
