Atualità
La campagna de sensibilisaziun sön l’adoziun mët man ai 20 de aurí
La poscibilité da ti dé na familia ai mituns y ales mitans é la chestiun prinzipala dl’adoziun. Por sensibilisé i zitadins sön chësta forma speziala de raport él la Repartiziun Politiches Soziales che á metü da jí na campagna de sensibilisaziun. Dai 20/04 inant gnarál taché sö placac sön les architades dles corieres te Gherdëna, a Balsan, tl Sarntal, tl Salten-Scilier, y sön le Ritten.
„L’adoziun é n gran sëgn de amur y solidarieté ti confrunc de na möta y/o de n möt por ti garantí n dagní te n contest familiar“, á splighé l’assessuria por les politiches soziales Martha Stocker. Cun l’aziun de sensibilisaziun „„Na storia n pü'atramënter: mia adoziun“ dessel gní aumenté les conescënzes di zitadins sön chësta tematica.
Tres n’aziun de visibilité, che piará ia en lönesc, ai 20 de aurí, gnarál taché sö placac sön les architades dles corieres te Gherdëna, tla cité de Balsan, tl raiun de Salten-Scilier, tl Sarntal, sön le Ritten y tl Eggental. Sciöche imaja por i placac él gnü chirí fora n per cun mituns y le slogan „Eine etwas andere Geschichte: meine Adoption" („Na storia n pü atramënter: mia adoziun“), por sotligné la forma de relaziun speziala danter i mituns y i geniturs. I placac sará da odëi te döt Südtirol te periodes desfarëntes.
Implü él ciamó preodü na seria de publicaziuns cun articui, reportajes che cunta de esperiënzes diretes y n valgügn contribuc tles televijiuns. Le punt culminant dla scomenciadia sará n convëgn sön la tematica dl’adoziun ai 19 de novëmber, organisé dala Repartiziun Politiches Soziales en colaboraziun cun l’Ofize di sorvisc por l’adoziun.
Ti ultims agn é le numer dles adoziuns jü zoruch. Tl 2014 él gnü adoté complessivamënter tl Südtirol 25 mituns, de chisc 5 da n’adoziun statala y 20 da n’adoziun internazionala y chësc é un di motifs por ciodi che la campagna vëgn metüda da jí.
rc
Galaria dales fotografies
