Atualità
La Repartiziun Mobilité vëgn organisada danü
Plü sorvisc cun le medemo numer de colaboradus sará la sfidada prinzipala por la Repartiziun Mobilité tl dagní. Da plü co n ann laora i colaboradus y i suranstanc deboriada por inrescí la reorganisaziun, por partí sö les competënzes damí y por garantí n mioramënt di sorvisc. „I colaboradus é te chësc prozes la ressursa plü importanta“, recorda l’assessur Mussner tratan la presentaziun.
Por analisé les ressurses atualmënter desponibles y por otimisé la spartiziun di laurs á la Repartiziun Mobilité metü da jí da plü co n’ann n prozes d’analisa dl tëmp de laur, dles prestaziuns de laur pitades y dla contentëza dles colaboradësses y di colaboradus dla Repartiziun. „De düc i chestionars che i ún partí fora nen él rová zoruch indöt le 87 porcënt cun tröpes propostes interessantes por la reorganisaziun“, á dit le diretur dla Repartiziun Günther Burger da püch al’incuntada de presentaziun di resultac ales colaboradësses y ai colaboradus dla Repartiziun. N cuarto di colaboradus foss cinamai a öna da tó sö ciamó plü prestaziuns de laur, insciö Burger. Tratan na seria de workshops él gnü coiü adöm i dac sön le tëmp por fá i laurs y la cuantité di sorvisc pitá por lauré fora na seria de mosöres por la reorganisaziun che ti gnará sëgn presentades ai direturs y ai colaboradus. „Insciö sarál poscibl da nes mioré ciamó de plü, da partí sö les prestaziuns de laur damí, da scemplifiché les competënzes internes, da aumenté la comunicaziun y da ti pité ai zitadins sorvisc plü efiziënc y asvelc“, á splighé Burger che á sotligné inant che ti proscims mëisc gnarál organisé danü les unités d’aministraziun.
„Nosta ressursa plü importanta resta tres ciamó i colaboradus“, á sotligné l’assessur competënt Florian Mussner, che á anuzé l’ocajiun por se rengrazié pro düc i colaboradus y dötes les colaboradësses por só laur al’intern dla repartiziun. „Vignun é damané da fá para le plü che ara va pro le prozés de renovamënt por mioré nosc laur y ti pité ai zitadins sorvisc efiziënc", insciö l'assessur Mussner.
Ince le diretur general Hanspeter Staffler á recordé che na reorganisaziun é tres ince n’ocajiun por i colaboradus por imparé cosses nöies y svilupé inant sües competënzes. „La Repartiziun Mobilité á metü man le prozes de renovamënt te na manira sistematica, tolon ite bele tl mëteman düc i colaboradus y i suranstanc“, á laldé Staffler. „Nosta aministraziun dess gní svilupada inant por podëi ti dé na resposta efiziënta ales esigënzes nöies che gnará lapró y tl medemo momënt sarál important da aumenté la responsabilité singula de vigni setur“, insciö l’assessuria por l’aministraziun Waltraud Deeg.
rc
