Atualità
„Ëres informades“, la lista dles incuntades cina jügn
Dan la palsa da d’isté él ciamó preodü de plü incuntades tl contest dl program „Ëres informades“ cina ai pröms de jügn. Chësc proiet vëgn organisé dala Comisciun provinziala por l’avalianza dles oportunités y dal Sorvisc Ëres, adöm cun i Comuns, y á sciöche fin chël da pité informaziuns d'ütl y atuales por les ëres dl Südtirol. N’incuntada ince a La Val ai 3 de jügn.
La seria de scomenciadies y conferënzes d’informaziun y d’ajornamënt, metüdes da jí te döta la Provinzia dala Comisciun provinziala por l’avalianza dles oportunités y dal Sorvisc Ëres á sciöche fin chël da ti pité ales ëres informaziuns ütles y impulsc interessanc sön tematiches atuales. L’assessuria Martha Stocker sostëgn chësc proiet deache al renforzëia le barat d’informaziuns danter les ëres y la costruziun de na rëi por porté inant proiec deboriada.
I termins por i mëisc de má y jügn é:
La jornalista y regista Astrid Kofler tignará en vëndres, ai 15 de má dl 2015 dales 18.00 tl zënter „Annahaus“ a Magré (Magreid) n referat sön la vita dles paures tl Südtirol ti agn passá.
En vëndres ai 22 de má dales 20.00 presentará la publizista Astrid Schönweger y la mediadëssa culturala tl zënter „Annahaus“ a Magré (Magreid) n referat sön les capazités dles erbes tla medejina y dles rezetes che vëgn adorades por varí da maraties, por la belëza y por la cura dla ciasa y dl urt.
Maria Paregger, esperta de medejina y omeopatia, tignará en mertesc ai 27 de má dales 20.00 na conferënza tl zënter „Lachmüllerhaus“ a Porsenú, olache ara nen jará dla fitoterapia de jëne.
Les conescënzes sön les proprietés dles erbes de medejina y dles rezetes adorades por varí da maraties, por la belëza, la cura dla ciasa y dl urt sará al zënter dl referat dla publizista Astrid Schönweger y dla curadëssa culturala Irene Hager von Strobele en mercui ai 3 de jügn dales 20.00 tl salf dles assoziaziuns a La Val.
Dla medejina naturala y dl’omeopatia nen jarara te n referat de Kathrin Fischer en mertesc ai 3 de jügn dales 20.00 tla Biblioteca zivica de St.Johann (San Jan) tl Ahrntal.
L’entrada a dötes les sëres d’informaziun é debann. Plü informaziuns pon ciafé chiló: http://www.provinz.bz.it/chancengleichheit/service/vortragsreihe-informierte-frauen.asp
rc
