Atualità
Dala Junta: implanc idroeletrics, 244 miliuns de compensaziuns ambientales
La Junta provinziala á aprové incö (26 de ma) le documënt dles oblianzes por la gestiun de 8 implanc idroeletrics. Les conzesciuns de chisc implanc é gnüdes ejaminades danü dan da püch. Cun l’aprovaziun da incö él le manajadú di implanc, la SE-Hydropower, che messará paié fonds de indöt 244 miliuns de euro sciöche mosöres de compensaziun ambientala por la perioda dal 2010 al 2040.
Sciöche bele anunzié dala Junta provinziala „ne ti gnarál nia smendrí le contribut che reverda les mosöres de compensaziun ai Comuns vijins, gnanca do la re-ejaminaziun dles conzesciuns por i implanc idroeletrics“ á prezisé l’assessur competënt Richard Theiner. La Junta provinziala á insciö aprové incö, mertesc ai 26 de ma, le documënt dles oblianzes por la gestiun de 8 implanc idroeletrics, sön chi che la Junta â damané n’ejaminaziun nöia conscidran te chësta prozedöra tres le contribut plü alt dé dant dala SEL, l’aziënda por l’energia provinziala. „I ti ún impormetü ai Comuns da tó en conscidraziun tres l’import plü alt dl contribut, chësc é gnü fat“, á dit incö le presidënt dla Provinzia Arno Kompatscher tratan la conferënza stampa do la sentada dla Junta.
Sciöche conseguënza de chësta dezijiun messará la SEL y la sozieté dla SE Hydropower paié indöt la soma de 244 miliuns de euro de compensaziuns ambientales por la perioda dal 2010 al 2040. Chësc porta cun se spëises ajuntives por les döes aziëndes de 97,4 miliuns de euro y che reverda i implanc idroleletrics de Lana, S. Valpurga d'Ultimo, S. Pancrazio, Sarnthein, Kardaun, Pruca, Porsenú y Mühlwald. Al ti gnará assegné contribuc de compensaziun a 20 Comuns, plü avisa i Comuns de: Sarnthein, Ulten, Perbian, Laion, Pruca, Ciastel, Morins de Türesc (Mühlen in Taufers), Türesc, Pancrazio, Lana, Balsan, Karneid, Ritten, Fié (Sciliar), Porsenú, Lijun, Natz-Schabs, Franzensfeste, Rodeneck y Mühlbach.
rc
