Atualità
La Junta provinziala á nominé le diretur general nü dl’Aziënda sanitara
La Junta provinziala á nominé incö (mertesc ai 9 de jügn) do na prozedöra de seleziun gnüda manajada da na comisciun d’esperc y sön proposta dl’assessuria por la sanité Martha Stocker le diretur general nü dl’Aziënda sanitara dl Südtirol. Al se trata de Thomas Schäl che tignará na conferënza stampa de presentaziun ai 12 de jügn.
Dla comisciun d’esperc che á manajé la prozedöra de seleziun ál fat pert le diretur dla Caritas da denant Heiner Schweigkofler, le diretur dla Banca popolare Johannes Schneebacher, l’aconsiadëssa Sabine Fischer, le diretur dl Departimënt Sanité dla Regiun Friul-Aunejia-Iulia Adriano Marcolongo y la suranstanta da denant dla „Gesundheit Österreich GmbH“ Michaela Moritz. La comisciun d’esperc á nominé Thomas Schäl sciöche candidat su por le post dl diretur general dl’Aziënda sanitara dl Südtirol. Tratan süa sentada edemala da incö á la Junta aprové la nominaziun, dantadöt ince por l’esperiënza de plü agn y dër desvalia de Schäl tl setur sanitar, olache al á lauré te aziëndes sanitares desvalies y por le Minister dla sanité.
„Thomas Schäl á desmostré tles incuntades che i ún albü sües capazités spezifiches tl setur dla sanité y competënzes de comunicaziun y é insciö do mia minunga la dërta porsona por chësta inciaria“, insciö l’assessuria por la sanité Martha Stocker. „I sun sigüda che cun sües vijiuns da defora y cun sües idees de basa positives portará Schäl n contribut dër important te chësta situaziun cun gran mudaziuns“, insciö Stocker. Le diretur general nü Thomas Schäl tignará na conferënza stampa de presentaziun, adöm cun l’assessuria Stocker,
en vëndres ai 12 de jügn
dales 09.00
tl salf stampa
dl palaz Widmann,
plaza Silvius Magnago 1
a Balsan.
rc
