Atualità
Dala Junta: contrac publics, colaboraziun cun le Trentin
Le Südtirol y le Trentin renforzëia la colaboraziun por ci che reverda i contrac publics. La Junta provinziala á aprové incö (mertesc ai 9 de jügn), sön proposta dl presidënt Arno Kompatscher, n protocol d’acordanza che á sciöche obietif chël da smendrí i cosć y da mioré l’efiziënza dles prozedöres.
Le protocol d’acordanza aprové dala Junta provinziala vëgn realisé sön la basa de plü rajiuns. „Da öna na pert – á splighé le presidënt Kompatscher – orun adaté te na manira unitara a livel regional les diretives europeiches che regolëia i apalc publics y i contrac dles conzesciuns che reverda i seturs dl’ega, dl’energia, di trasporc y di sorvisc dla posta. Dal’atra pert orunse ince presenté adöm al Trentin nostes ghiranzes iuridiches al govern nazional por avëi plü pëis canche ara nen va de tratatives che reverda nosta autonomia te chisc seturs.“
Le protocol, che ará na dorada de trëi agn, prevëiga na colaboraziun danter les döes Provinzies dai punc de odüda aministratif, iuridich y legal cun l’obietif da aprofondí i sistems d’informaziun y les prozedöres burocratiches. Chëstes prozedöres dess porté a n aumënt dl’efiziënza y dla trasparënza tla materia complicada di apalc. „L’obietif de chësta prozedöra é danter l’ater le smendrimënt di cosc, mioran tl medemo tëmp la cualité y l’efiziënza por ti dé plü pëis ai produc y ales imprejes locales“, á recordé le presidënt dla Provinzia Arno Kompatscher.
L’acordaza é gnüda ratificada incö (ai 9 de jügn) dala Junta provinziala y prevëiga la creaziun de na mësa tecnica formada da suranstanc y funzionars competënc tla materia che ará le compit da coordiné i laurs. „Lauran deboriada te na manira plü strënta cun le Trentin orunse renforzé y tutelé nostes competënzes te n setur dër compliché“, á stlüt jö Kompatscher.
rc
