Atualità
Dala Jonta: furmazion nueva medejina generela
Pervia di svilups dla medejina generela che se porta pro tres ora y di bujëns dl personal medich iel stat debujën de adaté l program de furmazion prufescionela. Ntan la senteda da ncuei (16 de juni) à la Jonta provinziela apurvà la mudazions revardëntes la pert teorica y pratica.
Bele tl 2002 y tl 2003 ie la furmazion spezifica de medejina generela unida mudeda radicalmënter cun l avanamënt da doi a trëi ani de curs, ma do na desëina d’ani ie l problem inò atuel. “Da ntlëuta se à la materia mudà dassënn – spliega l’assessëura Martha Stocker – sciche nce i bujëns di/dla dutores. Perchël ons tëut la dezijion de ntervenì cun na revijion dl program de furmazion che curespuend śën defin ai criteres naziunei y europeics”. Per fé chësc ti à la Jonta dat la crëta a na grupa de lëur che à cunlaurà a na maniera strënta cun l’Università de Düsseldorf y cun de gran esperc/espertes dl setor sciche l prufessëur Heinz Harald Abholz.
L program de furmazion nuef de medejina generela vëij danora n avanamënt de ëures al’ena de pratica per i/la dutores de basa ti ambulatueresc de medijina generela, sciche nce ti reparc de psichiatria, otorinolaringoiatria y urologia, y tl medemo mumënt la reduzion d’ëures ti reparc de medejina nterna, pediatria y ortopedia. Oradechël vëniel juntà da nuef i tëmps de pratica de neurologia, neurochirurgia y cures paliatives, ntan che al post dla chirurgia vëniel tëut ite na esperienza tl prim aiut. N à nce redefinì la pert teorica cun deplù lerch per la malaties croniches, la cures paliatives, la gastroenterologia, i eletrocardiograms, l’ecografies, i aspec giuridics y chëi liei ala nrescida. “Son segura” – dij Martha Stocker – “che cun chësc program nuef sarons boni de crië fundamëntes mo plu stersces per chi che lëura tl ciamp dla medijina generela, cossa che va a bën di pazienc”.
usp
