Atualità
Dal’Euregio i temesc dl mëis
La transumanza dles bisces dala Val Senales al Ötztal tl’Austria, le professor Matteo Borzaga dles Universités de Trënt, Balsan y Desproch, le „voluntary disclosure“ y l’auto-denunzia dl patrimone al ester nia detlaré: chisc é i temesc dl mëis publichá sön la presënza internet dl’Euregio Tirol-Südtirol-Trentin www.europaregion.info.
N iade al mëis tematisëia l’Euregio sön süa presënza internet na personalité dl’Euregio, n post interessant da vijité y na chestiun iuridica relevanta por düc trëi i raiuns dl Tirol-Südtirol-Trentin.
La personalité dl mëis é chësc iade Matteo Borzaga, professur universitar che é atif tl ciamp academich y dl’inrescida te dötes trëi les Universités dla Euroregiun ti lingac talian y todësch. Borzaga é nasciü a Trënt y al s’interessëia da bele 15 agn dles normes iuridiches che reverda i seturs dl laur, dl dërt europeich y interazional y dl dërt che regolamentëia les politiches soziales. Al é autur de sura 70 publicaziuns. Por informaziuns plü monüdes prëibel jí sot a: http://www.europaregion.info/it/matteo-borzaga.asp
Ai 15 de dezëmber dl 2014 á le Parlamënt talian aprové na lege che consënt de regolamenté volontariamënter patrimoni o davagns esters nia detlará cina sëgn fiscalmënter. Tl’Euregio, olache al pó suzed sovënz da studié o lauré te n ater Stat por n valgügn mëisc o agn, ne él nia dainré da avëi n cunt bancar ajuntif te n ater Paisc. Co dess pa le contribuënt se comporté te chisc caji por avëi na posiziun fiscala en armonia cun la lege? A chësta domanda ti respognél Gert Gassert, aconsiadú fiscal. Por informaziuns plü monüdes tliché sön: http://www.europaregion.info/it/page-2194.asp
La transumanza dles bisces dala Val Senales al Ötztal tl Tirol é öna dles tradiziuns plü spetacolares dl’Euregio, n’usanza che vëgn praticada vigni ann y che fej pert dl patrimone cultural dl umanité reconesciü dal UNESCO. Vigni ann, tl mëis de jügn s’incunta n valgügn zidlabisces dla Val Venosta y dla Val Senales por jí adöm cun les bisces por arjunj la localité da munt de Vent. Les 1.500 bisces é piades ia incer les cin’ dadoman por jí sön la ütia Bella Vista por daldô jí jö ales pastöres dla Val de Venter. I zidlabisces y i cians acompagnëia les bisces por dui dis sön na trata de indöt 44 chilometri. Por plü informaziuns jí sot a: http://www.europaregion.info/it/transhumanz.asp
rc
Galaria dales fotografies
