Atualità
Families: La gestiun dl contribut regional passa ala Provinzia
Le contribut regional por les families podará gní gestí tl dagní autonomamënter dala Provinzia. La Junta regionala á dé incö te süa sentada ai 23/07 l’aprovaziun por le passaje dles competënzes.„Chësc passaje nes pormët da armonisé deplü les mosöres tl setur dles politiches familiares, da adoré i mesi te na manira plü spezifica y da scemplifiché le paiamënt di contribuc“, insciö l’assessuria Deeg.
I limic de davagn y i contibuc regionai por les families ne gnará tl dagní nia plü stabilis dala Regiun, mo dales Provinzies de Balsan y Trënt aladô di mesi finanziars a desposiziun. Te chësc vers á la Juna regionala stabilí incö, jöbia ai 23 de messé les condiziuns por le passaje dles competënzes aladô dla lege regionala dl 2005 che reverda le pachet dles families y dl’assistënza soziala. Chësc dessëgn de lege é insciö la basa por le passaje dles competënzes.
„Tres chësta mudaziun sarál poscibl da acordé le contribut por les families danter la Regiun y la Provinzia por adoré i mesi finanziars a desposiziun te na manira plü mirada y efetiva“, á sotligné l’assessuria Waltraud Deeg. Implü sarál ince poscibl da scemplifiché la prozedöra por fá domanda y por paié fora i contribuc, sotlignëia Deeg.
La proposta de lege aprovada incö dala Junta regionala messará ciamó passé la votaziun tl Consëi regional. Daldô gnará i criters por le paiamënt dl contribut finanziar adatá ales normes iuridiches nöies y che ará valüta probabilmënter dal 2017 inant. Ciná dailó gnarál paié fora i contribuc finanziars aladô dla normativa atuala. Por l’ann 2015 él preodü na spëisa de contribuc por les families de 37 miliuns da pert dla Provinzia y da prestaziuns statales y de 36 miliuns da pert dla Regiun.
rc
