Atualità
Kompatscher dan la Comisciun parlamentara: ampliamënt dl’Autonomia
Por sotligné l’ampliamënt dl’Autonomia dl Südtirol y la recuperada y metüda en segurëza dles competënzes dla Provinzia él intergnü incö ai 30 de messé le presidënt dla Provinzia Arno Kompatscher tratan n’audiënza dan la Comisciun parlamentara por les Regiuns. Implü á le presidënt ince sostigní so impëgn por l’aprovaziun dles normes d’atuaziun, por che le Südtirol pois ademplí sües responsabilités.
La Comisciun parlamentara por les Regiuns cun a ce Gianpiero D’Alia analisëia atualmënter la situaziun dles autonomies speziales ince por ci che reverda la reforma dla costituziun. N’analisa aprofondida vëgn ince fata dala comisciun sön le rode dles comisciuns paritetiches. Por stlarí la situaziun vëgnel ince metü da jí de plü aldiziuns di surastanc dles Regiuns y Provinzies autonomes.
Incö danmisdé, jöbia ai 30 de messé, él gnü organisé n’audiënza cun le presidënt dla Provinzia dl Südtirol Arno Kompatscher che á scomencé süa relaziun cun n zitat dl Presidënt de Stat da denant Giorgio Napolitano, che á definí l’autonomia dl Südtirol, tres süa ancoraziun internazionala, n’autonomia speziala danter les atres autonomies, „dantadöt por ci che reverda la storia dl raiun y les mendranzes che vir adöm tla provinzia y che mëss gní sconandes.“
Na tematica importanta dl’audiënza é stada l’atuaziun dl Statut d’autonomia. Le presidënt dla Provinzia á sotligné l’importanza dla revalutaziun dles normes d’atuaziun y á dit: „L’autonomia mëss ester dinamica y á debojëgn da s’adaté tresfora. Les normes d’atuaziun á te chësc contest n rode fondamental y chësc dess ince resté tl dagní insciö. Porchël él important da tigní fora conflic pro la spartiziun dles competënzes che röia spo dan la Curt costituzionala.“
Le Südtirol á, en confrunt ales atres autonomies speziales, plü normes d’atuaziun, ci che confermëia le bun clima por les tratatives danter la Provinzia y le Stat. „Nosta autonomia y l’aministraziun locala s’á svilupé bun, porchël sunse ince arjigná ca por azeté de plü responsabilités“, á ajunté le presidënt Kompatscher incö tratan l’audiënza.
Le presidënt dla Provinzia á ince prezisé l’importanza de n svilup dinamich dl’autonomia, che toles ite les mudaziuns soziales y economiches, por atué ince mosöres nöies, che podess ester d’ütl por d’atres regiuns. „Adaté y amplié l’autonomia restará n compit costant y nezesciar ince tl dagní“, insciö le presidënt Kompatscher. Te chësc vers él important da ciafé zoruch y da mantigní chës competënzes che dal 2001 ne vëgn nia plü reconesciüdes deplëgn. „Nosc obietif é chël da porté inant la reforma dl Statut d’autonomia tla medema perioda dla reforma dla costituziun se basan sön le pat de sigurté firmé danter Stat y Provinzia“, insciö Kompatscher. Le consëns cun le Stat ne é nia ma n dërt, mo ince n’oblianza, dantadöt conscidran la valüta internazionala dl Statut d’Autonomia.
rc
