Atualità
Südtirol Abo+: Les domandes online funzionëia bun
Ciamó cina ai 15 de setëmber pó i abonamënc abo+ por scolars y studënc gní adorá. Por düc chi che ó renové l’abo+ por le proscim ann de scora o academich pó le fá online paian ince la cuota anuala dër comot dal computer. „Les domandes online funzionëia bun, ares pó gní manajades debota y ares smendrësc la burocrazia“, insciö l’assesur competënt Mussner.
Söporjö n terzo di abonamënc debann por scolars é bele gnüs renová por le proscim ann de scora. „En pert él ciamó n valgügn anuzadus che á de pices malsegurëzes pro la compilaziun dles domandes online. Le sistem funzionëia bun, insciö vëgnel ince anuzé cotan la poscibilité da paié ite la soma anuala tres internet“, spliga le diretur dla Repartiziun Mobilité Günther Burger, che aconsiëia da renové i abonamënc abonora, por che i scolars y studënc pois anuzé so abo+ bele dai pröms dis de scora.
Por chësc ann vál debojëgn da paié ite 20 euro al’ann por i scolars y les scolares che ó s’anuzé dl abo+. L’abonamënt por lerneri y studënc costa sciöche denant 150 euro al’ann. Les domandes de renovamënt dl abo+ o dla pröma iscriziun pó ma plü gní fates online; por i mituns sot ai 18 agn éres da fá dai geniturs o da na porsona autorisada al’educaziun. Jogn sura i 18 agn pó fá la domanda instësc. I abonamënc vel dal momënt che an á paié inant.
Por fá na domanda online por l’abo+ vál debojëgn de chisc documënc:
- dac personai y numer dl codesc fiscal sciöche ince la definiziun prezisa dla scora dla porsona che á l’abo+ frecuentëia
- dac personai y numer dl codesc fiscal dla porsona che fej domanda
- eventualmënter ince i dac personai y le numer dl codesc fiscal dl intestatar dl cunt (sce al ne é nia la medema porsona che fej la domanda)
- numer dla cherta dl abo+ (a pert iscriziuns nöies)
- copia digitala o n’imaja tlera dla cherta d’identité dla porsona che fej domanda, chësta mëss gní dada jö alplü tert 15 dis do la domanda, tres n’email (ala misciun che gnará visualisada ala fin dl prozes de domanda) o tres l’inserimënt de na copia dl documënt sön le cunt personal dl’anuzadú (sce an á ince le Südtirol Pass)
La soma anuala pó gní paiada insciö:
- online cun na cherta de credit ala fin dla compilaziun dla domanda o te n secundo momënt sön le cunt personal dl anuzadú dl Südtirol Pass
- tres la funziun de home-banking dles banches dla Raiffeisen, dla Cassa dl Sparagn y dla Banca popolara dl Südtirol
- paian cun contanc pro les portines autorisades tles staziuns dles ferates y dl’Aziënda dl trasport dl Südtirol se portan para l’abo+
- cun n ordin permanënt bancar (SEPA Direct Debit)
rc
