Atualità
Ferates y rodes tla Val de Puster - Mussner: "Plü ferates ti fins dl'edema"
Escursciuns cun les rodes vëgn dër aprijades: porchël gnarál amplié ti fins dl'edema dl mëis de agost la linia dla ferata tla Alta Val de Puster cun cater iadi implü por ti jí adincuntra al numer plü alt de ziclisć che jará cun la ferata. „Cun chësta mosöra orunse ti dé na maiú lerch ai ziclisć y sostigní chësta forma de turism ecologich y sportif“, sotlignëia l’assessur Florian Mussner.
Tles ultimes edemes á le trasport dles rodes funzioné bun do l’arat dl diretur dla Repartiziun Mobilité Günther Burger. Al ne se á formé degügn de gragn problems por la lerch dles rodes, ince por mirit dl laur de sensibilisaziun y dla buna colaboraziun cun i responsabli dles ferates, i comuns y les comunités comprensoriales, les forzes dl ordin y cun de plü responsabli di seturs dl turism y dla mobilité, insciö Burger. La capazité é ince gnüda ampliada tres n’aumënt di vaguns dles ferates FLIRT. Implü gnarál tut demez n valgügn posć da se senté por ti fá ciamó plü lerch a chi dles rodes.
L’esperiënza di ultims agns dij che dantadöt tles fins dl’edema de agost él tröc ziclisć tles ferates. Le numer avisa depënn ince dal tëmp y dales condiziuns meteo. „Cun l’ajunta de coliamënc dles ferates te trames döes les direziuns s’unse arjigné ca por i fins dl’edema che vëgn tla perioda cun le numer plü alt de ghesć da d’isté“, insciö l’assessur por la mobilité Florian Mussner.
Danter Bornech y Sanciana vëgnel ajunté tles prömes cater fins dl’edema (sabeda y domënia) dl mëis de agost chëstes ferates:
Partënza da Bornech por Sanciana dales 13.00 (chësta ferata pëia ia dales 12.20 da Franzensfeste), sciöche ince dales 16:04, dales 17:04 y dales 18:04
Partënza da Sanciana por Bornech dales 15.20, dales 16.20, dales 17.20, dales 18.20 (l’ultima ferata vá inant cina a Franzensfeste)
Informaziuns por che che se tol para les rodes te ferata:
Pro i laurs de ressanamënt dles staziuns dles ferates y pro la cumpra dles ferates nöies ti él gnü dé n gran pëis al trasport dles rodes. Por rajuns de segurëza, di orars da respeté y de lerch él gnü limité le numer de rodes por ferata. Sciöche alternativa él poscibl ince da se impresté fora rodes diretamënter dales staziuns dles ferates.
Le trasport dles rodes sön i mesi dl trasport publich mëss gní paié y costa 15 cent por vigni chilometer o sis euro por un n dé. Chësta tarifa vël ma por les ferates locales tl raiun dl’Aziënda dl trasport dl Südtirol, chël ó dí cina Trënt, Prener y Vierschach-Helm. Dal 1 de setëmber gnarál a se le dé cambiamënc por les tarifes dl trasport dles rodes.
rc
