Atualità
Euregio, portal dl Centená: d’agost nen vára dla prijonia de vera
Les condiziuns de vita di prijoniers de vera y les conseguënzes dles porjiuns tles valades y ti paisc é les döes tematiches prinzipales sön le portal internet dla Gran Vera dl’Euregio Tirol-Südtirol-Trentin. Ince chësc iade vëgnel presenté la teamatica aladô de trëi domandes y respostes. Da lí do, sciöche ince ti mëisc passá, sot ala seziun de „Let’s talk“ de www.14-18.europaregion.info.
Prësc vigni otavo soldá é rové te prijonia tratan la Pröma Vera Mondiala. Les strotöres por la prijonia di Stac te vera ne â dër sovënz nia les capazités por la lerch por saré ia la gran cuantité de soldas che gnô sará ia. Ma tl’Austria-Ungheria êl gnü saré ia dai 1,8 cina 2,4 miliuns de soldas che messâ gní socodis cun medejines y patüc da mangé.
Dal 1915 inant messâ i prijoniers de vera daidé para dantadöt tl’agricoltöra y tl’economia forestala, sciöche ince pro la costruziun de strades, de rëis por les ferates y pro la condüta dl’ega. La rëi dles ferates gnô gonot ampliada cun l’aiüt de soldas, sciöche por ejëmpl pro la costruziun dla rëi dles scines te Ghërdena dal 1915 al 1916, olache passa 6000 prijoniers de vera â lauré para. Por i Stac ê i prijoniers de vera na forza laur bunmarcé, mo cun la dorada tres plü lungia dla vera ne â le Stat nia plü assa da mangé por i soldas, ince deache la popolaziun instëssa patî la fan.
Sön le portal dl’Euregio vëgnel implü ince analisé les conseguënzes dla prijonia di soldas, i compic che ai messâ fá y le patüc da mangé che ai ciafâ. La prijonia di soldas tratan la vera é ince na tematica che vëgn tratada te plü mostres tl raiun dl’Euregio. Öna de chëstes é la mostra „I Trentini nella guerra europea 1914-1920" dl Museum Storich de Trënt, che ti vá a funz ales condiziuns de vita di prijoniers trentins.
Plü informaziuns pón ciafé sot a: http://www.14-18.europaregion.info/http://fondazione.museostorico.it/index.php/Il-Museo/Mostre-temporanee/I-Trentini-nella-guerra-europea-1914-1920
rc
