Atualità
Dolomites patrimone UNESCO: incuntades dla mësa torona permanënta
La planificaziun de proiec y de aziuns tles Dolomites patrimone UNESCO é stada la tematica zentrala dla pröma sentada dla „mësa torona permanënta por les Dolomites patrimone Unesco“ che s’á incunté por le pröm iade en vëndres ai 31 de messé tl Palaz provinzial 11 a Balsan.
Sot ala direziun dl Ofize Parcs naturai dla Repartiziun Natöra, contrada y svilup dl teritore s’ál incunté en vëndres ai 31 de messé por le pröm iade „la mësa torona permanënta por les Dolomites patrimone Unesco“ a Balsan. Chësta mësa torona é gnüda istituida cun na deliberaziun dla Junta provinziala ai 30 de jügn cun l’obietif da se crüzié dl’atuaziun di fins strategics tla pert südtiroleja dl raiun sot a sconanza UNESCO. Implü dess la mësa de discusciun porté dant idees a livel provinzial, les valuté y les adaté spo concretamënter.
„La colaboraziun danter düc i esperc di seturs desvalies é fondamentala por l’atuaziun di proiec tl raiun dl patrimone mondial dles Dolomites y chësta colaboraziun dess tl dagní ciamó gni ampliada y renforzada deplü“, spliga Florian Zerzer, diretur dl Departimënt Svilup dl teritore, ambiënt y energia. L’assegnaziun dl titul de patrimone mondial porta para na seria de gran poscibilités, che dess sëgn gní concretisades tl contest de na colaboraziun strënta y unificada, insciö Zerzer.
Le diretur dl Ofize Parcs naturai Enrico Brutti á recordé te chësc contest les proscimes scadënzes: le documënt sön na strategia dl turism mëss gní dé jö le proscim ann 2015, chël sön na strategia de gestiun por döt le raiun dles Dolomites UNESCO l’ann 2016. Implü él preodü le proscim ann l’ispeziun da pert dl’uniun por la sconanza naturala mondiala I.U.C.N. che é responsabla de n’inrescida dla situaziun atuala dl patrimone natural dles Dolomites sön inciaria dl comitê UNESCO.
Dla mësa torona permanënta fejel pert le Departimënt Svilup dl teritore, ambiënt y energia, la Repartiziun Natöra, contrada y svilup dl teritore, la SMG, le Raiun funzional dl turism, l’Agenzia provinziala por la Mobilité, les Repartiziuns Mobilité y Sorvisc Strades, l’Ofize Geologia y proes de material y le Geoparc Bletterbach. La proscima sentada dla mësa torona é preodüda por la fin d’agost.
rc
