Atualità
Kompatscher: „La politica economica y dl marcé dl laur funzionëia“
Le marcé dl laur y la situaziun dl’economia mëna fora inant segnai positifs de n svilup tla dërta direziun. „L’aumënt de 1,1 porcënt dl’ocupaziun é la desmostraziun che le trend dl marce dl laur é positif“, insciö le presidënt dla Provinzia Arno Kompatscher che vëiga ince les mosöres politiches y de alisiraziun dles cutes stabilides dala Junta provinziala sciöche fondamëntes por chësc svilup.
Sciöche unica Regiun dla Talia á le Südtirol podü registré n aumënt dl’ocupaziun de 1,1 porcënt. Bëgn dl 50 porcënt, en confrunt al ann passé, é ince aumentades les ocupaziuns a tëmp indeterminé. Valurs positifs ne é nia ma gnüs registrá pro i posć de laur, ince le numer di dejocupá é jü zoruch. N valur costant é indere gnü registré pro la dejocupaziun de dorada lungia. N ater dat che é gnü registré dala Repartiziun Laur é la tendënza al otimism da pert di daturs de laur.
Dötadöm valutëia ince le presidënt dla Provinzia Arno Kompatscher le svilup dl marcé dl laur cun otimism: „La politica economica y dl marcé dl laur stabilida dala Junta provinziala funzionëia. Les mosöres sciöche i credic por i ressanamënc tl setur dl frabiché y les alisiraziuns pro les cutes ti dá na sbürla al’economia, implü ái n impat dër positif sön le marcé dl laur y favorësc le clima de consum. N aiüt é de chësc vers dessigü ince la reforma statala dl marcé dl laur che á porté a n aumënt di contrac de laur a tëmp indeterminé.“
L’assessuria por le laur Martha Stocker sotlignëia le fat che la situaziun dl’ocupaziun é miorada te prësc vigni setur, dal artejanat, al comerz, al’industria cina al artejanat dl frabiché. Ma l’industria dl frabiché é ciamó te na situaziun statica, ince sce le numer di lauranc de 23.000 é plü alt co dan la crisa.
N rode spezial á tl marce dl laur dagnora le setur publich. Les aziëndes, i imprenditurs y imprejes economiches se damana dötaurela n smendrimënt dl aparat burocratich y n focus maiú sön les competënzes prinzipales. „Chësc nes é ince garaté en pert, pro l’aministraziun zentrala é le personal gnü smendrí dl un porcënt“, spliga l’assessuria por l’aministraziun Waltraud Deeg. L’assessuria sotlignëia te chësc contest ince che la Junta provinziala á aprové da ne smendrí degun personal ti seturs dla formaziun, dla sanité y di sorvisc soziai. Tl setur dla formaziun él implü gnü cherié 200 posć de laur nüs.
„Naturlamënter sunse ince avantajá dala strotöra dër desvalia y de gran varieté de nosta economia, che á desmostré la capazité da ti respogn damí co d’atri sistems a crises dl marcé dl laur“, sotlignëia le presidënt dla Provinzia, „mo le svilup positif che döra sëgn da plü tëmp é dessigü ince le resultat dles mosöres politiches che é gnüdes stabilides ti ultims mëisc.“
rc
