Atualità
Dala Junta: velozité, plü controi sön les strades da munt
Por smendrí le numer d’inzidënc sön les strades di jus da munt él la Junta provinziala che á aprové incö, mertesc ai 11 d'agost, l’introduziun de sistems de monitoraje dla velozité mesana cun sanziuns por chi che vá cun na velozité plü alta co chëra conzedüda.
„Prudënza y segurté – á sotligné l’assessur por la mobilité Florian Mussner – mëss ester les priorités fondamentales por düc i autisć che se möi sön strada. Dantadöt é chësc n messaje por i motoziclisć, che é plü a risch de ferides ince mortales pro inzidënc sön strada. Jí plü plan y ne superé mai i limic de velozité dl codesc dla strada dess deventé la normalité.“ N contribut important dal punt de odüda dla sensibilisaziun é ince gnü dala Provinzia, che mët a jí da passa diesc agn plü campagnes de sensibilisaziun, da No Credit a S.O.S Zebra, y che á contribuí a smendrí le numer de inizidënc mortai, passan dai 28 dl 2005 a n valur mesan de 14 di agn passá.
N’ezeziun é l’isté atual, tratan chël che ince les condiziuns meteorologiches vantajoses á porté pro a n aumënt costant di motoziclisć sön les strades da munt y a n numer dër alt de inzidënc mortai, cun le bilanz tragich de 11 morc ma ti mëisc da d’isté. „Dal’analisa di dac él tler che l’ezes de velozité é la gauja prinzipala di inzidënc: al é porchël nezesciar da aumenté i controi“, insciö l’assessur Florian Mussner. Por chësta rajun á la Junta provinziala tut la dezijiun da aprové n proiet che prevëiga l’istalaziun de sistems de relevamënt dla velozité mesana sön les trates de strades plü prigoroses por i motoziclisć.
Degöna dezijiun definitiva n’é incö gnüda tuta dala Junta por ci che reverda l’atrezatöra, mo te vigni caje él debojëgn de n’acordanza cun le Comissariat dl Govern, cun les forzes dl ordin y les aministraziuns comunales interessades por passé ala fasa operativa di controi. L’impëgn dla Provinzia tl setur dla segurté stradala, a pert les campagnes de sensibilisaziun sciöche No Credit y S.O.S Zebra, prevëiga ince intervënc dla segnaletica y dl’ilominaziun, sciöche ince l’istalaziun de 2350 metri de guardrail por i motoziclisć sön 63 trates conscidrades prigoroses por i motoziclisć.
rc
