Atualità
Bornech: Cumpra dl „Marienhof“ por otimisé l’assistënza sanitara locala
La Junta provinziala á aprové da püch sön porposta dl assessur por le patrimone Florian Mussner da cumpré la strotöra „Marienhof“ a Bornech. „Insciö sarál poscibl da reorganisé i sorvisc sanitars locai diretamënter dlungia l’ospedal da Bornech“, spliga le presidënt dla Provinzia Arno Kompatscher y l’assessuria Martha Stocker.
L’obietif dla cumpra dla stotöra dl „Marienhof“, dlungia l’ospedal da Bornech, da pert dla Junta provinziala é chël da anuzé sinergies y da otimisé i cosć cun na sënta unica di sorvisc sanitars locai che atualmënter é ince da ciafé, adöm cun na seria de sorvisc soziai, tla sënta tla strada Paternsteig a Bornech.
„La sënta atuala tla strada Paternsteig á la funziun de alberch por plü sorvisc sanitars y soziai dl raiun sozio-sanitar da Bornech y dla Comunité raionala dla Val de Puster. Tramidui i ënc á bele damané da plü tëmp do na reorganisaziun deache la lerch é massa strënta por düc i ofizi tla sënta atuala“, sotlignëia l’assessuria provinziala por la sanité Martha Stocker. Chisc sorvisc é atualmënter a desposiziun por dötadöm 36.000 porsones tl raiun de Puster. La cumpra dla stortöra dl „Marienhof“ dlungia l’ospedal da Bornech é gnüda stabilida da püch dala Junta provinziala sön proposta dl assessur por le patrimone Florian Mussner.
„Cun la cumpra dla strotöra dl Marienhof sarál poscibl da reorganisé i sorvisc sanitars locai te öna na sënta dlungia l’ospedal da Bornech y da sparagné i cosć sön i afic“, dij le presidënt dla Provinzia Arno Kompatscher che ajuntëia che „la sënta nöia sará ince tles vijinanzes dla staziun dla ferata y chësc porta para plü vantaji por i zitadins. Implü podará la lerch nöia tla sënta dla strada Paternsteig gní adorada por unifiché les strotöres di sorvisc soziai dla comunité raionala“. La soma che la Junta metará a desposiziun por la cumpra dl Marienhof é de un n miliun de euro.
rc
