Atualità
Stocker á incunté na delegaziun di doturs de medejina generala
Dan da püch á l’assessuria por la sanité y les politiches soziales, Martha Stocker, incunté na delegaziun di doturs de medejina generala por analisé la chestiun che reverda le contrat nü de transiziun dla categoria. L’incuntada á ponü la basa por les tratatives che reverda le contrat integratif provinzial.
Tratan l’incuntada cun l’assessuria Martha Stocker él gnü debatü sön la nezescité da fá n contrat de transiziun y integraziun dl contrat nazional sön la basa dla sentënza dla curt de Cassaziun. Te chësc contest á l’assessuria sotligné che „vigni situaziun nöia porta para plü cambiamënc. Nosc obietif é chël da superé la fasa atuala y da arjunje n’acordanza definitiva che reverda le contrat d’integraziun provinzial tignin cunt ince dles esigënzes y nezescités di paziënc. Les dificoltés messará gní debatüdes dai sindacac adöm ales Consultes provinziales competëntes por ciafé na soluziun.“
Tratan l’incuntada él insciö gnü ejaminé les mudaziuns che messará gní inserides tl contrat de transiziun sön la basa dla curt dla Cassaziun y che reverda le smendrimënt di paziënc a 1500, la domanda do na retribuziun valia ales prestaziuns, la revalutaziun dl rode dl dotur de familia tl contest dl’assistënza provinziala y so inserimënt tla reforma dla sanité.
„Nosc obietif resta inant chël – insciö l’assessuria Stocker – da investí tl mioramënt di sorvisc y tl renforzamënt dl’oferta d’assistënza sön le teritore. I ún ince tut la dezijiun che la norma di 1500 paziënc por dotur gnará ma aplicada sce le numer di doturs tles vijinanzes le conzed.“ Te chësc contest á l’assessuria Stocker damané ala delegaziun di doturs de medejina generala da nominé cin rapresentanc che fajará pert dl grup de laur por realisé la reforma sanitara. La ghiranza dla Junta provinziala é chëra da pié ia cun les tratives le plü debota che ara vá por arjunje n contrat d’integraziun nü por i doturs de familia.
rc
