Atualità
"Valivanza dla chances danter ëiles y ëi tla rë": iscrizion nchin ai 04/09
Ai 11 de setëmber 2015 uniral tenì la cuarta edizion dl cunvëni "valivanza dla chances danter ëiles y ëi tla rë", urganisà dala Cumiscion provinziela per la valivanza dla chances danter ëiles y ëi y dal Servisc per l’ëiles. L'iscrizion al cunvëni vën stluta ai 4 de setëmber 2015 pra l Servisc per l’ëiles (tel. 0471 416950, e-mail: serviziodonna@provincia.bz.it).
"Valivanza dla chances danter ëiles y ëi tla rë" ie n cunvëni pensà coche forum de ancunteda danter i organisms de valivanza dla chances danter ëiles y ëi. La Cumiscion provinziela per la valivanza dla chances y l Servisc per l’ëiles ie l pont de referimënt per la cuestions y problematiches defrëntes de chisc organs che vën purtedes a discuscion ntan l cunvëni cun l fin de dé mpulsc nueves per l’ativiteies dl daunì.
"Per la persones atives tl ciamp dla valivanza dla chances danter ëiles y ëi, ie nosc cunvëni che vën urganisà per l cuarto iede for na bona ucajion per se cunëscer y per se baraté ora. Perchël à l cunvëni l titul ‘valivanza dla chances danter ëiles y ëi tla rë’. L’edizion nueva dl cunvëni mpermët de vester particulermenter nteressant, ajache do l’ultima veles cumeneles puderan udei enghe n valguni nuef musc danter la partezipantes. Propi perchël se cunzentrea l program dla scumenciadiva sun l lëur di Chemuns y speron te na gran partezipazion, nsci la presidënta dla Cumiscion provinziela per la valivanza dla chances dl’ëiles, Ulrike Oberhammer.
"L ie for fruteivl, meter n lum, tres l barat cun autra ëiles, la sfides dla valivanza dla chances danter ëiles y ëi da ponc d’ududa y esperienzes defrëntes, sotrissea l'assessëura provinziela per la valivanza dla chances danter ëiles y ëi Martha Stocker. "L cunvëni purterà pro a renfurzé la rë danter l’ëiles atives y nteresedes politicamënter y a purté inant, n var do l auter, i nteresc n cumenanza sun livei defrënc”, nsci Stocker.
La manifestazion ie fisseda per n vënerdì, ai 11 de setëmber 2015, cun l scumenciamënt di lëures dala 17:00, tla Conference Hall dl’Academia Europeica (EURAC), tla streda Druso 1, a Bulsan. Ntan l cunvëni “valivanza dla chances danter ëiles y ëi tla rë“ uniral inò a s’l dé n barat de esperienzes y de minonghes danter persones nciariedes per la valivanza dla chances danter ëiles y ëi ti cumiteies y tla cumiscions, ti chemuns y tla istituzions, danter amboltes, cunselieres, assessëures cumeneles y d’autra ëiles atives tla politica, ma nce danter persones che ie nteresedes a lauré te chësc ciamp.
L'iscrizion al cunvëni "valivanza dla chances danter ëiles y ëi tla rë " ie davierta nchin ai 4 de setëmber 2015, pra l Servisc per l’ëiles (tel. 0471 416950, e-mail: serviziodonna@provincia.bz.it ). I posć ie limitei.
USP
