Atualità
335 donadus de organs te Südtirol – Sëra d’informaziun a Badia
Dal scomenciamënt dla campagna „Spende Leben/Dona vita“ á 335 abitanc dl Südtirol detlaré süa desponibilité, tres na detlaraziun d’orenté, da dé inant i organs. „Le laur d’informaziun jará inant ince les proscimes edemes y i sperun da podëi ciamó sensibilisé tröc zitadins sön chësta tematica“, insciö l’assessuria Stocker che anunziëia l’arlunjamënt dla campagna.Ai 15/09 sëra d’informaziun a Badia.
Les listes de speta é lungies, i dondadus de organs é indere püc – ince tl Südtirol: L’ann passé á 80 paziënc dl Südtirol aspeté a na donaziun de organs, y ma 20 de chisc á ciafé na trasplantaziun da donadus dl Südtirol. Insciö sozedel ince sovënz che porsones amarades mëss aspeté plü agn por ciafé n organ che ti conzed da soravire y che baldi mör tratan la perioda de speta.
„Dal scomenciamënt dla campagna de sensibilisaziun „Spende Leben – Scinca Vita“ ai 27 d’aurí á indöt 335 zitadins y zitadines dl Südtirol dé jö la detlaraziun d’orenté por la donaziun d’organs ti raiuns sozio-sanitars y pro l’Assoziaziun di donadus dl AIDO“, chësc le pröm bilanz dl’assessuria por la sanité Martha Stocker. „I oress anuzé chësta ocajiun por ti dí dilan a vigni donadú, deache al s’á dé jö cun chësta tematica sensibla y cun na chestiun dër personala y por na dezijiun a bëgn dl proscimo“, insciö l’assessuria che rengraziëia ince les organisaziuns di paziënc y di donadus, di doturs y dles porsones interessades che á düc daidé por rové a chësc pröm bilanz positiy y che dará so contribut ince tles proscimes edemes. „La donaziun di organs é tres poscibla, ince do la campagna y les aziuns de sensibilisaziun“, recorda l’assessuria Stocker. Les prömes misciuns por s’informé é i doturs de familia, i raiuns soziosanitars, l’assoziaziun AIDO o – ma tratan la pratica de renovamënt dla cherta d’idendité – ince l’ofize dl comun.
La campagna d’informaziun „Spende Leben – Dona vita“ vá inant cina la fin d’agost cun plü manifestaziuns che tematisëia i aspec desvalies dla donaziun d’organs.
Ai 15 de setëmber gnarál tigní na sëra d’informaziun tla Ciasa J.B. Runcher a San Linert (Badia) dales 20.00 sön la donaziun de organs. Al ne tolará nia ma pert doturs y referënc dl setur, mo ince paziënc y rapresentanc de organisaziuns y assoziaziuns che se crüzia dl tema.
La chestiun „Salvé la vita cun la donaziun d’organs“ sará la tematica zentrala en mertesc, ai 25 d’agost tratan na manifestaziun d’informaziun tl foyer dl ospedal da Bornech cun scomenciamënt dales 19.30. En mertesc, al 1. de setëmber gnarál tigní n referat dales 19.30 tla aula magna dla scora profescionala por l’agricoltöra a Auer cun le tema „Na psica sterscia te na situaziun de vita ria“.
Informaziuns plü menüdes sön la campagna d’informaziuns pón ciafé sot a: http://www.provinz.bz.it/gesundheitswesen/buerger/kampagne-spende-leben-dona-vita.asp
rc
