Atualità
Tuní: Bandida europeica por la netijia de 200 galaries stradales
Cumpedada adöm é la trata complessiva de düc i tuní dl Südtirol lungia indöt 60 chilometri. Por garantí la netijia di parëis y dles strades al’intern dles galaries á la Junta provinziala tut la dezijiun inier (ai 25 d’agost) da scrí fora na bandida de concurs europeica por le sorvisc por i agn 2016 y 2017.
„Avëi parëis y strades nëtes al’intern dles galaries stradales dl Südtirol ti garantësc plü visibilité y segurëza ai autisć: la netijia di tuní porta insciö para na maiú lominosité y n’odüda plü ampla sön la strada y les atrezadöres de pröm aiüt y emergënza“, sotlignëia l’assessur Florian Mussner che é competënt por le sorvisc strades y che á lauré fora la proposta.
La Junta provinziala á insciö aprové te süa sentada inier ai 25 d’agost da scrí fora na bandida de concurs por na gara europeica por le sorvisc de netijia dles söporjö 200 galaries stratales tl Südtirol. Le cost complessif preodü dal Sorvisc Strades, olache al é ince gnü integré valgügn laurs por aumenté la segurëza, é de 1,3 miliuns de euro por i agn 2016/17. Pro i laurs aldél lapró danter l’ater l’eliminaziun dl stöp, la netijia dla pavimentaziun stradala, dles sperses d’emergënza, dla segnaletica stradala y di implanc de segurëza.
rc
