Atualità
L assessëur per i chemuns Schuler anconta i aministradëures cumisseres
Siegfried Rainer y Theodor Rifesser mëina nchin ala proscima veles ai 15 de nuvëmber i destins di chemuns de Natz-Schabs y Urtijëi. L assessëur provinziel per i chemuns à rujenà ncuei, prim de setëmber, cun i doi aministradëures de chemun per nriescer coche la sta cun i lëures ti doi chemuns.
Theodor Rifesser, che ie stat ani alalongia diretëur dl Istitut Pedagogich Ladin, ie ai 12 de mei unit cherdà dala Jonta provinziela a fé l cumisser dl chemun de Urtijëi, ulache l ne se à nia purtà pro n cunsëi cumenel pervia che l ne fova nia unit arjont l quorum che fossa stat de bujën. Siegfried Rainer, che fova n iede diretëur dl’autorità de verdia di chemuns, ie unit numinà cumisser dl chemun de Natz-Schabs ai 9 de juni, ajache l ne ie te chël chemun nia stat mesun mëter adum na Jonta cumenela.
L assessëur provinziel per i chemuns Arnold Schuler se à nfurmà ncuei, n ucajion de n’ancunteda, pra i doi cumisseres de co che i valutea l’atmosfera ti chemuns aministrei da d’ëi y deberieda ài rujenà de cie che i se aspieta y coche la sta cun i lëures.USP
