Atualità
Plü segurëza sön strada por scolars y seniors: Aziuns nöies cun S.O.S.Zebra
Aumenté la segurëza di percursc da jí a scora y tles vijinanzes dles strisciores pedonales sciöche ince promöie la mobilité sostenibla: chisc é i obietifs dla campagna de sensbilisaziun „S.O.S.Zebra!“ dl 2015 organisada dales Repartiziuns Sorvisc Strades y Mobilité. Les aziuns planificades é gnüdes presentades incö (07/09) en ocajiun dl scomenciamënt dl ann scolastich dal assessur Florian Mussner.
Plü segurëza por les porsones che se möi a pé, percursc da jí a scora sigüsc y sostëgn ala mobilité sostenibla - sön chisc trëi pilastri se basëia l’ediziun nöia dla campagna de sensibilisaziun „S.O.S.Zebra!“ 2015, organisada dales Repartiziuns Mobilité y Sorvisc strades, y che se coliëia insciö ales aziuns organisades l’ann de scora passé. Le program nü é gnü presenté incö, lönesc ai 07 de setëmber, dal assessur por la mobilité Florian Mussner y dal diretur de Departimënt Valentino Pagani tla sënta dl Safety Park a Vadena.
„I peduns é la componënta plü debla dl sistem stradal y dantadöt mituns mëss gní sconá te na manira particolara - chësc é l’obietif prinzipal dla campagna de sensibilisaziun nöia“, á splighé l’assessur por la mobilité Florian Mussner. „I autisć y i ziclisć mëss reconësce che les strisciores pedonales é na zona dër sensibla che mëss gní respetada y olache i peduns á la prezedënza“, á sotligné Mussner. „Cun le proiet de S.O.S Zebra che vëgn metü da jí en colaboraziun strënta cun l’Ökoistitut, la polizia comunala y le Safety Park, él nosc obietif da sostigní indô ativamënter les scores por tematisé y aumenté la segurëza stradala sön i percursc di mituns da jí a scora y da promöie na mobilité plü ‚vërda’“, spliga l’assessur Florian Mussner. La buna partezipaziun dl ann passé, cun söporjö 1.000 scolars, geniturs y insegnanc che á fat para, á desmostré che l’oferta de SOS Zebra zulanta vëgn azetada dër bun tles scores y chësc é sté por nos na motivaziun implü da jí inant cun la campagna ince chësc ann, insciö Mussner.
Le diretur de Departimënt Valentino Pagani á sotligné tratan so discurs che le prigo da morí do n inzidënt sön strada é plü gran por porsones che vá a pé. „Tres de stletes condiziuns de visibilité, dantadöt de nöt, na velozité massa alta y n atraversamënt dla strada zënza ciaré aumentëia i prighi de inzidënc cun conseguënzes agravades por peduns“, insciö le diretur de Departimënt che á injunté, che le prigo de ester vitima de inzidënc é dantadöt alta pro i seniors y che al vëgn insciö ince lauré por adaté le sistem stradal ales esigënzes di zitadins sura i 65 agn. La Provinzia se crüzia dl mantignimënt de indöt 1350 strisciores pedonales te döt le raiun provinzial, recorda le diretur de Departimënt. „Cun costruziuns de proteziun söi marciapisc y dlungia les strisciores pedonales, sciöche ince tres le smendrimënt dla velozité al’intern dles localités él nosc obietif da aumenté la segurëza por düc i peduns“, insciö Pagani.
„I mituns á debojëgn de na sconanza particolara al intern dl sistem stradal, ince deache ái reagësc gonot te na manira impulsiva y deache la capazité de reconësce pericui sön strada é impormó madüda daldöt dai 14 agn inant“, á sotligné la garanta por l’adolëscenza y l’infanzia Paula Maria Ladstätter. La garanta á damané a düc i autisć y ziclisć da rovëne cun tröpa prudënza tles vijinanzes de scores, scolines y strisciores pedonales y da tigní ite tres i limic de velozité, deache chël pó salvé vites, insciö Ladstätter. Implü él important da ti segnalé abonora ai mituns i prighi sön strada y da ti trasmët n sentimënt de segurëza, insciö Ladstätter.
La presidënta dla Crusc blancia provinziala Barbara Siri á splighé por l’ocajiun le funzionamënt de n intervënt de prescia y á sotligné, che al é important da resté, do n inzidënt, pro les porsones ferides, da fá le numer d’emergënza 118 y da scomencé cun les mosöres salvavita. „Vigni menüt é important“, á recordé Siri. Campagnes de sensibilisaziun é ince n contribut important por trasmët la segurëza stradala te na manira che pó gní capida dai mituns, „mo ares ne pó nia sostituí la responsabilité personala“, insciö Siri. La presidënta dla Crusc blancia provinziala á ince aconsié i geniturs da vistí i mituns cun corusc lominusc y da ti dé para, canche ai vá cun la roda, le casco y les löms. „Al é damí da rové n valgügn menüc massa tert, mo porchë sigüsc“, á sotligné Siri.
Adöm cun l’Ökoistitut él insciö gnü lauré fora n program dër ampl por scolars y scolares dales scolines cina les scores altes. Insciö vëgnel pité por ejëmpl rodes acompagnades por descurí i prighi sön le percurs de scora, aconsiamënc sön i prighi tles vijinanzes dles scores, mostres temporanees, fujines pratiches por cuncé les rodes y aziuns de acompagnamënt di scolars a ciasa. Na gran importanza á te chësc contest la colaboraziun cun les istituziuns locales, les rapresentanzes di geniturs y di comuns, dla polizia comunala y dl consëi de vigni scora. Implü vëgnel ince metü da jí aziuns de promoziun dla mobilité sostenibla, seminars da plü dis y eserzitaziuns pratiches al Safety Park. Nü lapró é ince n valgönes scomenciadies por les porsones sura i 65 agn che reverda la segurëza sön strada.
Informaziuns dër ütles sön n comportamënt sigü tles vijinanzes de strisciores pedonales contëgn le codejel nü de „S.O.S.Zebra!“, che pó gní desciariades y lites do diretamënter sön les plates internet dles Repartiziuns Sorvisc Strades y Mobilité por ladin, talian y todësch. Material d’informaziun ajuntif gnará ince partí fora tles scores dal Ökoistitut y pro les portines de informaziun dl Ofize Renovamënt patent.
rc
