Atualità
Sistemaziun strades dla Val Badia: suralüsc de Tommasini y Mussner
De plü suralüsc sön trëi cantiers stradai dla Val Badia á fat dan da püch i assessurs competënc Tommasini y Mussner adöm cun i responsabli tecnics y i ombolc dla Val Badia. Dötadöm é i laurs bele gnüs stlüc jö, al vá ciamó debojëgn de de pici intervënc de sistemaziun dles strades provinziales da Rina, San Martin y Pidrô. L’investimënt complessif é de 8,5 miliuns de euro.
La pröma tapa dla vijita di assessur por i laurs publics Christian Tommasini y por la sistemaziun dles strades Florian Mussner é stada la strada provinziala SP128 danter Longega y Rina. Adöm cun l’ombolt dl Comun de Mareo Albert Palfrader él gnü analisé la situaziun di laurs dla strada provinziala nöia por Rina. Da püch él gnü stlüt jö i laurs dl terzo lot. Sön inciaria dla Repartiziun Infrastrotöres él gnü ressané y amplié, dantadöt tles otes plü strëntes, na trata de indöt 2,2 chilometri. Le cost di laurs de sistemaziun é sté de indöt 5,6 miliuns de euro. I laurs por la sistemaziun dl terzo lot é gnüs fac dal’impresa OBEROSLER Cav.Pietro s.r.l. La realisaziun dl proiet é gnüda manajada dal injenier Gustav Mischí, diretur dla Repartiziun Infrastrotöres dla Provinzia.
Le suralüch di cantiers é jü inant cun na vijita tl Comun da San Martin adöm cun l’ombolt dl Comun Heinz Videsott y che reverda i laurs de dortorada dla strada provinziala 29 che porta dal zënter dl paisc de San Martin de Tor al Museum Ladin Ciastel de Tor, che é gnüs stlüc jö da püch. Le ressanamënt jô debojëgn por slarié fora la strada y por aumenté la segurëza di autisć y di peduns. Tres la sistemaziun dla strada él sté poscibl da eliminé n valgönes perts strëntes y da ti dé ai autisć y peduns n'odüda plü ampla sön le trafich. Adöm cun le slariamënt dla strada él ince gnü realisé n marciapisc sön le pröm toch dla strada ala fin dl zënter dl paisc tla direziun de Restalt. Le marciapisc pita plü segurëza y pó gní anuzé dala jënt dl post y dai ghesć sciöche coliamënt por spaziré y vijité le Museum Ladin Ciastel de Tor tres le tru che porta sön Col. I laurs é gnüs fac dal’impresa "Ploner s.r.l" por püch deplü co 462mile euro, dl coordinamënt s’á fistidié l’Ofize tecnich Strades nord-est dla Provinzia sot ala direziun dl injenier Gustav Mischí.
N’atra staziun dla vijita di assessurs Tommasini y Mussner é stada la strada provinziala SP60 che porta da Pidrô cuntra La Val. Adöm cun l’ombolt da La Val Angel Miribung él gnü analisé i laurs de ampliamënt dl pröm toch dla strada provinziala che porta da Pidrô cina La Val. Adöm cun le slariamënt dla strada él gnü realisé n marciapisc nü cun proteziuns che ti pita plü segurëza ales porsones che vá a pe. Lapró él ince gnü realisé n coliamënt cun na stiga che porta dal marciapisc al tru che vá inant cina tl zënter dl paisc de Pidrô. Atualmënter vëgnel ciamó fat i laurs de contlujiun. I laurs é gnüs fac dal’impresa "Ploner s.r.l", dl coordinamënt s’á fistidié l’Ofize tecnich Strades nord-est dla Provinzia sot ala direziun dl injenier Gustav Mischí. Le responsabl dla realisaziun é sté l’injenier Giuseppe Palumbo, le diretur di laurs y responsabl dla segurëza é sté l’injenier Mario Valdemarin.rc
Galaria dales fotografies
(d.m.c.): le diretur de departimënt Paolo Montagner, l'assessur Tommasini, le diretur dla Repartiziun Infrastrotöres Gustav Mischi, l'ombolt Angel Miribung, l'assessur Mussner adöm ai responsabls tecnics
(d.m.d.): le diretur de departimënt Paolo Montagner, i assessurs Mussner y Tommasini, l’ombolt Albert Palfrader y le diretur dla Repartiziun Infrastrotöres Gustav Mischi (pröm da man ciampa)
