Atualità
Dala Junta: respet dl bilinguism, contestá i concursc dla Polizia
La Junta provinziala ó defëne le dërt al’adoranza paritara di lingac provinziai tl’Aministraziun publica y porchël éra antergnüda te dui caji de concursc dla Polizia statala, do che al é gnü constaté na violaziun dles desposiziuns dl Statut d’autonomia. La Junta á tut incö (ai 6 d’otober) la dezijun da contesté les perts che reverda le Südtirol.
Les zitadines y i zitadins dla Provinzia de Balsan á le dërt da d’adoré ince le lingaz todësch tles relaziuns cun les Aministraziuns publiches y ti prozedimënc iudiziars, aladô de ci che vëgn odü danfora dales normes d’atuaziun dl Statut d’autonomia. Chësc vel por les Aministraziuns provinziales y comunales, mo ince por les Autorités statales tl Südtirol. Pro i concursc por curí i posć tla Polizia tl Südtirol vëgnel porchël preodü l’atestat de conescënza di dui lingac che mëss ti corespogne al titul de stüde damané. Sciöche an sá vëgnel odü danfora 4 categories d’ejam de bilinguism (A, B, C y D), aladô dl titul de stüde.
L’ann passé él gnü scrit fora n concurs dal Ministere dl Intern por plü co 7.500 posć tla Polizia dl Stat, cun posć resservá al Südtirol y al Trentin. Tla gradatöra publicada dedô resultëiel trëi candidac che á indere ma l’atestat de bilinguism D, ince sce le concursc ê gnü scrit fora por na cualificaziun profescionala che metô danfora le diplom de scora mesana, chël ó dí almanco l’atestat de biliguism C. “Dal punt d’odüda iuridich se tratel chiló de na violaziun tlera dl Statut d’autonomia”, á alzé fora le presidënt Kompatscher. Porchël á la Junta delibré da contesté chësta gradatöra por la pert che reverda le Südtirol, por garantí ince conescënzes linguistiches adatades dl personal.
Tla medema manira á la Junta provinziala tut la dezijiun da contesté ciamó n ater concurs che reverda l’assunziun straordinara de 1.050 candidates y candidac a agënc de Polizia. Por le Südtirol vëiga le concurs danfora ma un n post por na candidata bilinga o n candidat bilingh, "y chësc dat ne respetëia nia le raport danter la popolaziun locala en raport a chëra nazionala", insciö Kompatscher. Al vëgn porchël damané che le concursc vëgnes sopenü por les perts che reverda la Provinzia de Balsan.
OSP
