Atualità
Dala Junta: Partis sö 85 miliuns de euro dal Fonds strategich regional
Cun indöt 85 miliuns de euro ó la Provinzia de Balsan investí tl svilup dl teritore. Al se trata de ressurses finanziares metüdes a desposiziun dal Fonds strategich regional por investimënc a bëgn dl svilup dl teritore. La Junta á aprové incö (ai 13 d’otober) le program cun i seturs d’investimënt prinzipai.
Le Fonds strategich por investimënc tles zones rurales é gnü istituí dala Regiun tl ann 2012 por favorí investimënc te zones rurales cun pücies infrastrotöres tl Südtirol y tl Trentin. Incö, mertesc ai 13 d’otober, á la Junta provinziala debatü sön la spartiziun di 85 miliuns che ti speta al Südtirol y stabilí n program d’intervënc.
Insciö gnarál investí 25,7 miliuns de euro ti seturs dla proteziun zivilia y dla proteziun cuntra le medefüch. 17 miliuns é gnüs resservá al setur dl’agricoltöra, dui miliuns gnará metüs a desposiziun por le svilup dl’agricoltöra da munt, 9,3 miliuns por la costruziun de scores, 2,5 miliuns por implanc sportifs y 2,3 miliuns por i sorvisc por i jogn.
Cun indöt 5,4 miliuns de euro gnarál finanzié mosöres de ressanamënt y ampliamënt dl’infrastrotöra dla mobilité. 4,3 miliuns de euro é preodüs por la realisaziun dl’eletrificaziun dla „Vinschger Bahn“ y 1,1 miliuns por sostigní la costruziun de implanc portamunt dles piceres localités. Implü él ciamó preodü le finanziamënt de 20,7 miliuns de euro dl fonds de rotaziun sciöche impuls finanziar por le svilup dl’economia.
„Chisc mesi finanziars é preodüs sciöche investimënc por le svilup dles zones rurales, dl’agricoltöra, dl comerz, dl artejanat, dl tursim, dles strades, di implanc portamunt dles piceres localités, di zëntri por la jonëza y por la costruziun de scores“, á sotligné le presidënt dla Provinzia Arno Kompatscher che á injunté che chëstes ressurses finanziares é ince n meso por ti respogn ales domandes do finanziamënc bele presentades.
rc
