Atualità
Aeroport, Kompatscher: „Discusciun ogetiva y nia ideologica“
Le presidënt Arno Kompatscher tól posiziun en referimënt ales critiches da pert de n grup d’assoziaziuns cuntra le proiet che reverda l’aeroport de Balsan. „Al se trata de n na ideologich – á splighé le presidënt dla Provinzia tratan la conferënza stampa do la sentada dla Junta provinziala – ma do la presentaziun dl plann strategich podarál gní daurí na debatüda ogetiva.“
Aladô dl presidënt dla Provinzia Arno Kompatscher „ne rapresentëia les critiches nia n problem deache düc á le dërt da dí süa minunga, ci che i ne capësci nia é la tempistica adorada, püc dis dan l’aldiziun tl Consëi provinzial preodüda por ai 20 d’otober.“ En chël de ti gnarál presenté al Consëi provinzial sides le 'business plan' co ince la strategia de svilup dl aeroport de Balsan, „y al gnará metü sön mësa düc i dac – á injunté Arno Kompatscher – y dötes les zifres che reverda le numer di passajiers atuai y potenziai, i cosć y les entrades preodüdes, sciöche ince na proposta de lege che gnará ejaminada tres n referendum popolar.“
Por ci che reverda i cosć prezisëia le presidënt dla Provinzia les zifres presentades tles ultimes ores: „I á lit che an baia de 50 miliuns che la Provinzia messass paié ti proscims cinch agn. I pó garantí che en realté é la soma cotan plü basa.“ Por stlü jö á le presidënt Kompatscher ajunté che „les critiches portades dant dales assoziaziuns cuntra l’aeroport rapresentëia n na ideologich tl confrunt dl proiet. I speri che al sides poscibl da daurí na discusciun ogetiva sön i dac reai do la presentaziun dl plann strategich che reverda l’aeroport de Balsan.“
rc
