Atualità
Relaziun sanitara 2014 cun n’analisa particolara sön la sanité dles ëres
Te na conferënza stampa él gnü presenté incö, lönesc ai 19 d’otober, a Balsan dal’assessuria por la sanité y les politiches soziales Martha Stocker la „Relaziun sanitara 2014“. Le focus dl’inrescida da chësc ann é sté n'analisa particolara che reverda la sanité dles ëres.
Mesamënter vigni de 8500 rezetes, 800 vijites al Pröm aiüt, 3700 sorvisc d’assistënza sanitara y 8800 sorvisc spezialisá - chëstes é ma n valgönes dles zifres che reverda l’assistënza sanitara tl Südtirol. La relaziun dl setur sanitar dl 2014 é gnüda presentada incö (19 d'otober) dal’assessuria provinziala por la sanité y les politiches soziales Martha Stocker adöm ala coordinadëssa dl Osservadú epidemologich dla Provinzia Carla Melani. Na gran pert di sorvisc vëgn anuzada da amará cronics (28 porcënt dla popolaziun), de chisc da porsones che sofrësc de diabetes (4 porcënt), de valurs alc de ipertonia (15 porcënt), de maraties dles vies dl flé (4 porcënt) o che sofrësc de n crebesc (5 porcënt). L’assistënza sanitara di abitanc dl Südtirol costa, do l’arat dl stüde, 2.200 euro al’ann por vigni abitant.
N pëis particolar ti á l’analisa dé chësc ann ales problematiches coliades ala sanité dles ëres y ala „medejina de jëne“. Te süa introduziun á l’assessuria Martha Stocker sotligné che la „medejina de jëne alza fora la nezescité da analisé les desfarënzies de carater biologich, sozial, economich y cultural danter ëres y ëi y da tigní cunt de chëstes desfarënzies tla medejina y tla terapia.“ La presidënta dla Consulta provinziala por l’avalinaza dles oportunités Ulrike Oberhammer á dit che ince la consulta se dá jö cun chësta tematica che ne reverda nia ma les ëres, mo ince i ëi. La direturia dl Ofize Formaziun personal sanitar Veronika Rabensteiner á recordé che la tematica dla medejina de jëne dess ince gní integrada tla formaziun generala dla scora por profesciuns tl setur sanitar dla Claudiana. „Insciö él bele sön le program n de tematich ala Claudiana cun referac y workshops por i studënc sön la medejina de jëne“, insciö Rabensteiner.
La coordinadëssa dl Sorvisc epidemologich provinzial Carla Melani á spo presenté tl detai i dac plü interessanc che reverda la sanité dles ëres. Deache les ëres á n valur mesan de dorada dla vita plü alt en confrunt di ëi (85,7 agn les ëres, 80,8 agn i ëi), nen él ince de plü che patësc de maraties croniches (26.000 ëres y 17.000 i ëi). Ince le consum de medejines é pro les ëres (60 porcënt) plü alt co pro i ëi (48 porcënt), dantadöt por ci che reverda i psicofarmacs. „Les ëres patësc plü sovënz de depresciuns y de tëmes, de cuntra é la desponibilité pro les ëres plü grana da anuzé n’oferta terapeutica“, insciö Melani. Por ci che reverda le stil de vita nes mostra i dac che les ëres sofrësc demanco de surapëis (17,8 porcënt) en confrunt cun i ëi (34,9 porcënt). Le valur mesan dl consum de alcol „cun n prigo alt“ é ince te chësc caje plü bas pro les ëres co pro i ëi, mo cun 26,8 porcënt mesamënter plü alt co tl rest dla Talia. 21,8 porcënt dles ëres é fomadësses.
„83 porcënt dles ëres valutëia süa situaziun sanitara generala bun cina dër bun“, á stlüt jö Carla Melani süa presentaziun dla „Relaziun sanitara 2014“ che pó ince gní consultada sot a http://www.provinz.bz.it/eb/gesundheitsbericht/gesundheitsbericht.asp.rc
