Atualità
Kompatscher s’incunta cun na delegaziun dala Cina: autonomia y economia
Na delegaziun cineja, cun a ce l'aconsiadú tecnich-scientifch dl’ambasciada tla Talia, Cao Jianye, á vijité incö (ai 28 d’otober) a Palaz Widmann le presidënt dla Provinzia, Arno Kompatscher. Tl zënter dl’incuntada él sté l’autonomia dl Südtirol y poscibilités de colaboraziun ti seturs dl’economia y dl turism.
Le presidënt Kompatscher ti á presenté ala delegaziun cineja en cört la storia dl Südtirol, en particolar por ci che reverda le svilup dl’autonomia, conscidrada „nia ma na forma de sconanza dles mendranzes, mo ince n stromënt che funzionëia bun por sostigní le svilup dl’economia.“ Le presidënt dla Provinzia á sotligné inant l’importanza dl setur dl turism, mo ince i pilastri de svilup dl Parch tecnologich nü NOI che reverda l’energia, les tecnologies alpines y l’automotion. „Nosc teritore ará tosc a desposiziun na strotöra moderna cun impulsc dantadöt por le sistem economich, por merit ince dl’Aziënda speziala nöia IDM Südtitrol, che metará man sües ativités tl 2016“, insciö le presidënt Kompatscher.
Le presidënt dla Provinzia á injunté inant che „bele incö é la Cina n partner important por nostes imprejes y i sperun che chësta incuntada pois renforzé ciamó deplü le contat danter i dui sistems d'economia.“ Le aconsiadú tecnich-scientifich dl’ambasciada cineja da Roma, Cao Jianye, á recordé che „la colaboraziun economica danter la Talia y la Cina á na storia lungia de plü de 45 agn cun n davagn realisé de plü de 48 miliarg de dolars. Por Beijing – á splighé Cao Jianye – é la Talia insciö le cuinto partner europeich plü important y le barat danter i dui Paisc ne reverda nia ma le turism mo ince i cursc de formaziun tles Universités.“
Por ci che reverda le dagní él gnü ponü la basa por n valgügn proiec de cooperaziun da svilupé inant tl contest dl Forum Talia-Cina „cun n’atenziun particolara – á splighé le presidënt Kompatscher – ai Jüc Olimpics da d'invern che sará a Beijing tl 2022.“ Al’incuntada da incö, mercui ai 28 d’otober, a Palaz Widmann ál ince tut pert l’ambasciadu talian tla Cina da denant, Alberto Bradanini, le diretur designé dl IDM Hansjörg Prast y le presidënt dl TIS Nikolaus Tribus.
rc
