Atualità
3,6 miliuns por la formaziun y consulënza dles families
„I sun sigüsc che la promoziun di sorvisc d’assistënza spezialisá pois ti garantí ales families n sostëgn y n’informaziun plü ampla y n renforzamënt abonora“, á dit l’assessuria provinziala Waltraud Degg incö (ai 4 de novëmber) a Balsan ala presentaziun dles mosöres formatives preodüdes por les families dl Südtirol. Le Departimënt Familia mët a desposiziun vigni ann 3,6 miliuns de euro.
Le renforzamënt abonora y preventif dles families é un di trëi pilastri dla politica por les families tl Südtirol dlungia al sostëgn finanziar efetif y ales mosöres de sostëgn por armonisé familia y laur. „Le sostëgn y informaziuns abonora tres ofertes formatives nes consënt da ciafé fora y da afronté i problems bele tl mëteman“, á sotligné l’assessuria Deeg incö mercui, ai 04 de novëmber, ala presentaziun dl pachet de mosöres a Balsan. L’Agenzia por la familia mët a desposiziun 3,6 miliuns de euro al ann por indöt 80 organisaziuns che se crüzia dles ofertes de renforzamënt abonora dles families. Le 70 porcënt de chëstes ressurses é preodüdes por le finanziamënt dles ativités dles organisaziuns. I 20 zëntri geniturs-mituns (ELKI) dla Provinzia vëgn sostignis cun indöt un n miliun de euro, atri contribuc finanziars ti vëgn conzedüs ales strotöres formatives sciöche la Ciasa dla Familia y al Katholischer Familienverband, l’assoziaziun dles families catoliches. La soma che resta dl finanziamënt vëgn metüda a desposiziun por proiec inovatifs y por sostigní scomenciadies por la pröma infanzia. Dötadöm é les domandes do contribuc che röia adalerch al’Agenzia por la familia indöt de 100 al ann.
Les ressurses finanziares che vëgn manajades dal’Agenzia provinziala por la familia é preodüdes por organisaziuns che promöii scomenciadies de formaziun, sensibilisaziun, consulënza y acompagnamënt di geniturs y dles families. „I obietifs é chi da renforzé les competënzes di geniturs, da arjigné ca i geniturs a so rode de educadus y da mioré les relaziuns tles families por podëi manajé les chestiuns da vigni de te na manira relassada“, á splighé Michaela Stocker dl’Agenzia. „Te chësc vers é ince la colaboraziun söl post, danter Comuns y assoziaziuns, dër importanta deache al se trata dles istituziuns plü dlungia ales families“, insciö Stocker.
Tres l’Agenzia por les families dla Provinzia vëgnel sostigní programs de formaziun dles families y di geniturs, scomenciadies spezifiches, mo ince „Scores por i geniturs“ y incuntades de formaziun. Implü él ince preodü contribuc por ofertes de consulënza y acompagnamënt, de mediaziun te caji de separaziuns o devorz, sostëgn por geniturs susc, por ëi y por families patchwork. Les tematiches é desvalies, dal’informaziun sön la gravidanza, ala comuncaziun te situaziuns de conflit cina a chestiuns che reverda l’integraziun.
A öna dles sfidades che le Departimënt por la familia laora dötaurela é chëra da ajorné l'oferta: „Nosta ghiranza é chëra da coordiné ciamó damí les strotöres de formaziun y de sorvisc y da formé na rëi de colaboraziun ciamó plü strënta“, insciö l’assessuria Deeg. Un di seturs d’intervënt sará tl dagní le renforzamënt abonora dles familes cun la priorité ales tematiches dla separaziun y dl devorz, dla puberté y dl’eté dai 0 ai 3 agn di mituns.
rc
Galaria dales fotografies
