Atualità
Dala Junta: sostëgn al export, domandes cina ai 31 d’agost
Les domandes do sostëgn al export mëss gní presentades cina ai 31 d’agost cun l’injunta de na planificaziun prezisa di cosć y dles dates da tigní ite.
Ince chësc ann sostëgn la Junta provinziala cun na seria de mosöres l’internazionalisaziun dles imprejes, dantadöt de chëres mesanes y piceres. Al se trata de contribuc por la partezipaziun a fieres y a manifestaziuns y por fá analises söl marcé. Dui di obietifs prinzipai dl sostëgn finanziar é la daurida a plü marciá por les impreses locales y na sbürla por mioré la situaziun dl’ocupaziun te Südtirol. Le sostëgn provinzial pó rové cina al 50 porcënt di cosć ametüs.
Aladô dles desposiziuns statales por ci che reverda l’armonisaziun di sistems de contabilité dles Regiuns á la Junta provinziala messü adaté les tomades y les prozedöres por presenté les domandes da jená dl 2016 inant. La tomanda dl termo por la presentaziun dles domandes é insciö gnü antizipé ai 31 d’agost.
Les imprejes che á interes da ciafé les alisiraziuns preodüdes dala Junta, insciö á splighé incö le presidënt Kompatscher, messará presenté n progam de planificaziun cun la descriziun dl proiet, l’indicaziun dles dates de scomenciamënt y de stlüta dl proiet, meton ince ite tla planificaziun i investimënc preodüs ann por ann. A chëstes informaziuns mëssel ince gní injunté preventifs dles spëises o na lista detaiada cun düc i cosć preodüs. Dötes les domandes gnará spo ejaminades y les aprovaziuns ti gnará comunicades ales impreses cina la fin dl ann por podëi ti garantí na maiú segurëza tla planificaziun. Ince por merit dla Provinzia á les impreses südtirolejes aumenté tl 2015 de 9,8 porcënt les marcianzies y i sorvisc esportá cun n valur record de 4,3 miliarg de euro (fontana ASTAT).
rc
