Atualità
Dala Junta: concurs dla Guardia de Finanza y Buona Scuola
La Junta provinziala á contesté le concurs dla Guardia de Finanza. Buona scuola, la Provinzia vá a iudize dan la Consulta.
La Junta provinziala á tut la dezijiun da contesté le concurs scrit fora dala Guardia de Finanza por l’assunziun de 15 colaboradus permanënc cun „rode spezial“ por le 2016. „Le concurs ne prevëiga degügn posć resservá a partezipanc che á le atestat de bilinguism, sciöche scrit dant dal Statut d’Autonomia“, á splighé le presidënt dla Provinzia Arno Kompatscher. Les normes dl Statut garantësc ai zitadins le dërt al’adoranza dl lingaz todësch ti raporc cun l’aministraziun publica y ti provedimënc iudiziars. „De conseguënza, sciöche bele sozedü cun atri concursc, él la Junta che á aprové l’impugnaziun“, insciö Kompatscher.
La Junta á implü ince tut la dezijiun da jí a iudize do che la presidënza dl Consëi di Ministri â segnalé na chestiun de ilegitimité costituzionala por ci che reverda trëi articui dla lege provinziala d’ajornamënt dla lege statala "La Buona Scuola". Le Consëi di Ministri â contesté normes che reverda la valutaziun di suranstanc scolastics y di scolars, sciöche ince por ci che reverda l’assunziun dl personal insegnant che aladô dl govern vá sura les competënzes autonomes fora. „Por ci che reverda la norma söi suranstanc ne él degun dübe che la competënza é dla Provinzia y ince por ci che reverda i sistems de valutaziun él le govern che á segnalé l’orenté da orëi jí tla medema direziun“, insciö Kompatscher. La Provinzia de Balsan é indere desponibla da mudé l’articul de lege che reverda les assunziuns cun l’introduziun de n passaje che „stlarësc che les assunziuns gnará fates tres concursc publics“, stlüj jö le presidënt.
rc
