Atualità
Dala Junta: aprové le dessëgn de lege nü sön i museums
La Junta provinziala á aprové incö ai 14 de merz le dessëgn de lege nü sön i museums y les coleziuns.
“Al é d’importanza che i 10 museums provinziai cun sües 16 sëntes sparpagnandes fora sura döt le raiun provinzial y i atri museums tl Südtirol pois se svilupé tla rëi cun ativités ajornades y aladô de düc i regolamënc dl setur” alza fora l’assessur competënt Florian Mussner che á presenté le dessëgn de lege aprové incö dala Junta, che passa sëgn al Consëi provinzial. Cun l’ajornamënt provinzial ón ince ti pité a dötes les porsones che vá ti museums na lerch culturala plëna de vita y n post d’archirida che s’un tol ince sura de argomënc politics y soziai importanc, se tol a dí Mussner. “I orun mantigní i bëgns culturai dl post, renforzé la cosciënza dles porsones tl vers dles cultures tl Südtirol y ti dé ai museums y ales coleziuns locales n profil tler, deache chëstes strotöres y ci che ares contëgn porta pro a fá gní le Südtirol plü atratif sciöche sënta formativa, scientifica y economica” dij en cört Mussner che dëida recordé che ti 10 museums aministrá dal’ Aziënda provinziala él gnü registré dl 2016 incër 836.000 vijitadësses y vijitadus, che é porater n numer che crësc de ann en ann.
L’assessur rengraziëia la Repartiziun provinzala Museums che á lauré fora te n grup de laur cun a ce la direturia Karin Dalla Torre le dessëgn de lege cun rapresentanc di museums privac, comunai, eclesiastics y di Museums provinziai. Le test sostituësc la lege provinziala dl 1988, che vëgn oramai conscidrada vedla y nia plü omogena por gauja de intervënc che é gnüs fac cun le tëmp. “Al á porchël orü ester na interpretaziun nöia completa dles normes”, se tol a dí Mussner. Ti ultimi 30 agn s’á la museologia mudé defin. Le Consëi internazional di museums (ICOM), l’organism d’assoziaziun plü alt a livel mondial di museums á svilupé na definiziun de “museum” y de süa ativité reconesciüda sura döt le monn che la lege provinziala nöia sön i museums fej sëgn süa.
Le dessëgn de lege ne regolëia nia ma i dovëis, le funzionamënt y le finanziamënt di Museums provinziai, mo stabilësc ince te na manira tlera i fins dla Provinzia por promöie museums y coleziuns, tolon ince en conscidraziun le contribut sozial che ai dá tl cheder dl’autonomia dl Südtirol. Al vëgn metü l’azënt sön so carater de istituziuns culturales y educatives che cöi adöm y tëgn sö bëgns culturai d’importanza por le Südtirol por ti ai dé inant dantadöt ala popolaziun residënta y nen fá fora n oget d’inrescida. A chësc fej ince referimënt i criters generai presentá tla lege che regolëia i contribuc provinziai a museums y coleziuns, sciöche ince a assoziaziuns di museums. Al é d’importanza che al vëgnes indô metü sö la Consulta di museums cun esperc y espertes che rapresentëia i sogec desvalis che laora ti museums de nosta provinzia che pîta consulënza y arac sön argomënc tecnics y de politica di museums. Cun plü co 140 danter museums, coleziuns y lercs d’esposiziun cumpëda la contrada rica di museums di Südtirol museums ti ciamps dl ert, dla storia culturala, dla tecnica y dla natöra, partis sö sön döt le teritore.
USP
