Atualità
Metrobus, ok a proiet y cosć por le tunel dl Pillhof
Al costará indöt 17,6 miliuns de euro le tunel che gnará realisé al'altëza dl'incrujiada Pillhof a Appiano. Ok dala Junta provinziala incö .
Do l'ok de mascima d’otober dl ann passé ala varianta dl proiet Metrobus che preodô la realisaziun de n tunel por tigní fora l'incrujada dl Pillhof sön le teritore de comun de Appiano, á la junta provinziala aprové incö (14 merz) definitivamënter sides les carateristiches tecniches che i cosć dl'opera. Le proiet prevëiga l'ampliamënt y la sistemaziun dla strada statala, a na moda da garantí n miú azes ala galaria, che sará mez km lungia y podará gní fata a na velozité de 60 km/h. Al é ince preodü mosöres cuntra la vera dlungia la realisaziun dles fermades por i mesi publics y na plaza da parché por le barat. "Por mirit de chësta soluziun - comentëia l'assessur Florian Mussner – vëgnel grantí na miú situaziun dl trafich y la reduziun di prighi por chi che vá cun l’auto sön na trassa, olache al é le majer prigo de inzidënc. I vantaji sará clers por i residënc dl raiun, ajache por mirit dl tunel gnarál smendrí l'incuinamënt acustich y dl paesaje. Al afin aratunse che la varianta te tunel pois ester la soluziun plü adatada, ince sce an ponsa a proiec de mobilité tl dagní".
I investimënc implü dl terzo lot dl Metrobus é, do che al é gnü aprové la varianta de proiet incö (14 de merz) dala junta provinziala, de incër i 9,2 miliuns de euro, y tol ite la realisaziun dl tunel, l’adatamënt dla strada cun atrezadöres, espropriaziuns y acuisiziuns de raiuns, stüdi de trafich, planificaziun de analises geologiches y geotecniches. "Ince sce chësta varianta messass porté para intardiades tla realisaziun de proiet Metrobus – stlüj jö Mussner – aratunse che al sides la miú soluziun por n tëmp plü lunch por ci che ne reverda nia ma la viabilité, mo dantadöt la cualité de vita di residënc".
USP
