Atualità
Plü sigüda la strada danter Sëlva y Plan de Gralba: i laurs vá inant
Döes é les priorités di laurs de manutenziun: slarié la strada y aumenté la segurëza por i autisć y chi dla roda.
I laurs de ressanamënt y de ampliamënt dla strada é gnüs assegná tl mëis de setëmber de 2016 cun i pröms laurs che é bele gnüs completá dan l’invern 2016/17. Do la palsa invernala á i laurs indô metü man ai 4 de aurí dl 2017. Sciöche al spliga l’assessur provinzial Florian Mussner, responsabl por le Sorvisc Strades, reverda i laurs l’adatamënt dla seziun trasversala dla strada cun le fin da mioré la zircolaziun dl trafich y da aumenté la segurëza. „I intervënc de adatamënt y de sistemaziun é nezesciars por aumenté la segurëza y por amoderné la rëi stradala te döt le Südtirol“, insciö Mussner.
La sistemaziun dla strada é partida sö te trëi perts, döes de chëstes é bele gnüdes completades. Al se trata di intervënc dl ampliamënt dla ota tla localité Merch, che ê n punt critich dantadöt por le corieres che messâ se sposté sön l’atra pert dla strada. Atualmënter él insciö i laurs che vá inant tla zona dla ota „Sobosc“, olache al é gnü a se le dé tles vijinanzes n spostamënt de material sön strada tl isté dl 2016. Por smendrí le risch y i pericui te chësc setur stradal vëgnel lauré a n sistem de passaje dles eghes y implü vëgnel ince realisé i mürs dlungia strada y le guardrail. Implü vëgnel ince stabilisé sides la strada altafora co basfora cun parëis y mürs de sostëgn cun ancoraji permanënc.
Por che i laurs pois jí inant debota él preodü l’istalaziun de n passaje alterné regolamenté ma sön öna na pert dla strada. I intervënc vá ince inant tla sajiun da d’isté, mo ma aldinfora dles strades. La contlujiun dla sistemaziun dla strada é preodüda por dezëmber dl 2017.
USP
